Zelenskiy Janubiy Koreyaga harbiy yordam so‘rab murojaat qildi.
Ukraina prezidenti Volodimir Zelenskiyning ma’lum qilishicha, Rossiya qo‘shinlari tomonidan qamal qilinayotgan Mariupolda urush boshlanganidan buyon tinch aholi vakillari bo‘lgan o‘n minglab kishilar halok bo‘lgan. Bu haqda u Janubiy Koreya parlamentiga murojaati vaqtida aytib o‘tdi.
Zelenskiy shuningdek Rossiya yangi hujum boshlash uchun yana o‘n minglab harbiylarini yig‘ayotganini aytib o‘tgan. U katta ehtimol bilan rossiyaliklarning Donbassda keng ko‘lamli hujumga o‘tishga tayyorlanayotganini nazarda tutgan.
U Janubiy Koreyadan harbiy yordam so‘ragan.
«Bizga havo hujumidan mudofaa tizimlari kerak, samolyotlar, tanklar, boshqa zirhli texnikalar, artilleriya tizimlari va o‘q-dorilar kerak. Sizda esa bizga zarur narsalar bor», dedi u.
- Rossiya harbiylari mart oyi boshidayoq janubdagi port shahar Mariupolni qamal qilishni boshlagan. Mart oyi o‘rtalariga kelib mahalliy hukumat shahardagi binolarning 80-90 foizi vayron bo‘lgani va qurbonlar soni 2 mingdan oshgani haqida ma’lum qilgandi.
- 7 aprel kuni Mariupol meri Vadim Boychenko shaharda kamida 5 ming kishi halok bo‘lganini tasdiqladi.
- Urushga qadar Mariupol shahri aholisi 430 ming kishini tashkil etgan. Mer Vadim Boychenkoning so‘zlariga ko‘ra, aprel oyi boshida shaharda 100 ming atrofida kishi qolgan.