Germaniyadan kamida ikkita kompaniya - Knauf va WKB Systems - Mariupolda foydalanish uchun qurilish materiallarini yetkazib beryapti, bu haqda ARD kanalidagi Monitor teledasturi tomonidan olib borilgan surishtiruv natijalarida aytilgan.
Rossiyaning Ukrainaga qarshi urushi paytida rus qo‘shinlari tomonidan vayron qilingan va egallab olingan Mariupol shahrini qayta tiklashda Germaniya kompaniyalari ishtirok etmoqda. Germaniyaning ARD ijtimoiy-huquqiy telekanalining 3 aprel, chorshanba kuni chop etilgan Monitor dasturi jurnalistlari surishtiruvida shunday xulosaga kelingan.
Nashrning yozishicha, nemis kompaniyalarining RF QK tomonidan egallab olingan va Rossiya hududi deb e’lon qilingan, urush paytida vayron bo‘lgan Ukraina shahrini tiklashda ishtirok etgani haqidagi dalillarni izlashda jurnalistlar qurilish kompaniyalari, biznes saytlari ma’lumotlari, hujjatlar, foto- va videomateriallarga tayangan.
Mariupoldagi qurilish maydonchalarida Knauf sementi
Xususan, Mariupoldagi ko‘plab qurilish maydonchalarida Knauf tomonidan ishlab chiqarilgan sement ishlatiladi, deya ta’kidlaydi jurnalistlar. ARD ma’lumotlariga ko‘ra, hozirgi kunga qadar Knauf Rossiyada 4000 xodim va milliardlab rubllik aylanmaga ega. Tahririyat tomonidan so‘ralganda, kompaniya Rossiyaning Ukrainaga qarshi urushini qoralashini va RFga qarshi YeI barcha sanksiyalariga rioya qilishini bildirdi. Rossiyada ishlab chiqarilgan Knauf mahsulotlari «faqat Rossiya bozori uchun» mo‘ljallangan, deya qo‘shimcha qildi matbuot xizmati. Tahririyat tomonidan berilgan savollarning keng ro‘yxatiga hech qanday javob olinmadi, deb ta’kidlaydi ARD.
Bundestagning tashqi ishlar qo‘mitasi rahbari Roderix Kizevetter nemis kompaniyalarining egallab olingan shahardagi qurilish ishlarida ishtirok etishini qoralab, ularning xizmatlari xalqaro huquqni buzayotgan urush foydasiga ishlaydi, deb hisobladi.
WKB Systems beton bloklari
Bundan tashqari, Mariupoldagi qurilish maydonchalaridan olingan fotosuratlar va videolarda ARD jurnalistlari Shimoliy Reyn-Vestfaliyadagi Myunsterland mintaqasidan bo‘lgan WKB Systems nemis kompaniyasi nomi yozilgan yashil qadoqli plyonkadagi beton bloklarini payqadi. Boshqa narsalar qatorida, ushbu kompaniya beton bloklar ishlab chiqarish uchun zavodlarni jihozlaydi.
Kompaniyaning asosiy aksiyadori rossiyalik tadbirkor Viktor Budarindir. «Monitor’da mavjud bo‘lgan bojxona ma’lumotlari shuni ko‘rsatadiki, WKB Systems GmbH bir necha yillardan buyon Budarinning rus kompaniyalaridan biriga gazbeton bloklarni ishlab chiqarish bo‘yicha butun qurilmalarni yetkazib bergan - aftidan, Rossiya Mariupolda o‘z kuchini mustahkamlash uchun mahsulotidan foydalanayotgan kompaniyaga», - deyiladi tergovda.
Unda aytilishicha, Budaringa qarshi YeI sanksiyalari qo‘llanmagan. WKB Systems jurnalistlarning izohiga javob bermadi.
