10:30 / 20.06.2021
6375
“O‘zbekneftgaz”: Boshqaruv raisi Gazli regionida uglevodorodlarni qazib chiqarish va geologiya-qidiruv ishlari holatini o‘rgandi

“O‘zbekneftgaz” AJ Boshqaruvi raisi Mehriddin Abdullayev boshchiligidagi “Ishchi guruh” Gazli neft va gaz qazib chiqarish boshqarmasida bo‘lib, tabiiy gaz qazib chiqarilishi bo‘yicha belgilangan prognoz ko‘rsatkichlarini bajarish uchun amalga oshirilayotgan geologo–texnik tadbirlar holatini o‘rgandi.

Boshqaruv raisi boshchiligida 2021 yil yanvar-iyun oylarida uglevodorodlarni qazib chiqarish ko‘rsatkichlari bajarilishi, geologik qidiruv ishlari va erishilgan natijalar, quduqlarni burg‘ilash va mukammal ta'mirlash ishlari bo‘yicha tahliliy-tanqidiy yig‘ilish o‘tkazildi.

Yig‘ilishda kun tartibidagi masala, 2021 yil II choragida va 2021 yil davomida tabiiy gaz va gaz kondensati qazib chiqarish reja ko‘rsatkichlarini o‘z vaqtida va so‘zsiz bajarish, bu borada rejalashtirilgan geologo-texnik tadbirlarni amalga oshirish, geologiya qidiruv ishlarini jadallashtirish, uglevodorod zaxiralarini ko‘paytirish bo‘ldi.

Gazli neft va gaz qazib chiqarish boshqarmasi rahbari Xislat Nazirov tabiiy gaz qazib chiqarish prognoz ko‘rsatkichlarini ta'minlash, kunlik gaz qazib chiqarish hajmlarini oshirish borasida qilinayotgan ishlar bo‘yicha hisobot berdi.

Kon boshliqlari bilan birgalikda I yarim yillik hamda 2021 yil uchun tabiiy gaz qazib olish prognoz ko‘rsatkichlarini bajarish uchun barcha imkoniyatlardan foydalanilayotgani ta'kidlandi va tabiiy gaz qazib olish nazoratini kuchaytirish maqsadida kon boshliqlari doimiy faoliyat olib borayotgani aytib o‘tildi.

Boshqaruv raisi “O‘rtaqum” gazni birlamchi tayyorlash qurilmasini ishga tushirgandan so‘ng, “Andaqli”, “Shorqum”, “O‘rtaqum”, “Shimoliy Suzma” va “Chakkaqum” konlaridan qazib olinadigan tabiiy gaz xomashyosining sarfi aniqlanishi va kelgusida “Andaqli” koni gaz kollektorini kengaytirish bo‘yicha takliflar loyiha institutlari bilan o‘rganilishi bo‘yicha topshiriqlar berdi.

Shuningdek, “O‘zLITIneftgaz” AJ tomonidan “O‘rtaqum”, “Savatli”, “Kulbeshkak” va “Doyaxatin” konlarida qurilishi rejalashtirilgan obektlar loyiha-smeta hujjatlarining bir oy muddatda ishlab chiqilishi belgilandi.

Boshqaruv raisi Gazlidagi aloqa va axborotlashtirish ishlarini keskin tanqid qildi va “O‘zbekneftgaz” AJning Axborot kommunikatsiya texnologiyalari departamenti boshqarmaga qarashli barcha konlarda bir oy muddatda sifatli aloqa tizimini yo‘lga qo‘yish bo‘yicha vazifalarni belgilab berdi. Shuningdek, barcha konlarda mobil telefon aloqasini tashkil etish bo‘yicha topshiriqlar berildi.

Boshqaruv raisi Gazli regionida o‘g‘riliklar, talon-torojliklar va gaz kondensati o‘g‘riliklarining oldini olish uchun faoliyat olib borayotgan O‘zbekiston Respublikasi Milliy gvardiyasi xodimlarining faoliyati bilan tanishib chiqdi.

Ularga yaratib berilgan sharoit hamda qo‘riqlash xizmatini yanada kuchaytirish bo‘yicha fikr almashildi.

Ularning takliflari tinglandi hamda “O‘zbekneftgaz” AJ tomonidan bu borada amalga oshirilishi kerak bo‘lgan ishlar belgilab olindi.

Boshqaruv raisi Gazli regionidagi tabiiy gaz qazib chiqarish holatini o‘rganish maqsadida, “O‘rtaqum” konidagi 3-sonli Gazni birlamchi tayyorlash qurilmasi qurilish maydonida bo‘ldi.

Qurilish ishlarini sifatli olib borish hamda uni mukammal yakunlash bo‘yicha takliflar berildi.

“Andaqli” koniga tashrif buyurgan “Ishchi guruh” a'zolari ishchi-xodimlarning yashash hamda ishlash sharoitlarini o‘rgandi.

Boshqaruv raisi burg‘ilash ishlari olib borilayotgan 15-sonli quduqda mehnat qilayotgan ishchi-xodimlar bilan uchrashib, ularning muammolari va yaratib berilgan sharoitlarning qoniqarli yoki qoniqarsizligi bo‘yicha suhbatlashdi.

Aniqlangan kamchiliklar bo‘yicha joyida hal qilish maqsadida topshiriqlar berildi.

Shu kunning burg‘ilash ishlari borasida amalga oshirilayotgan ishlar joyiga chiqqan holda o‘rganildi hamda “Sho‘rqum” konidagi 4-sonli quduqdagi burg‘ilash ishlarida qatnashayotgan ishchilar bilan belgilangan vazifaning qay darajada bajarilayotgani muhokamasi o‘tkazildi.

Burg‘ilash jarayonida zarur bo‘lgan texnik jihozlarning mavjudligi, zarur vositalarning yetkazib kelinayotgani, ishni tezroq tugallash holati o‘rganildi.

Boshqaruv raisi burg‘ilash ishlarini tezroq tugatish va tabiiy gaz qazib olish hajmini oshirish bo‘yicha topshiriqlar berdi.

Tashrif yakunida olti oylik yakunlari bilan Gazli neft va gaz qazib chiqarish boshqarmasi uchun belgilangan vazifalarni va rejani so‘zsiz bajarish kerakligi, bu borada kamchiliklarga yo‘l qo‘yganlarga intizomiy jazo choralari ko‘rilishi ma'lum qilindi.

“O‘zbekneftgaz” AJ Matbuot xizmati(T)

Top