18:30 / 30.09.2021
3683
Maqsuda Vorisova Surxondaryo viloyati saylovchilari bilan uchrashdi
Foto: Xalq demokratik partiyasi

Bugun O‘zbekiston Xalq demokratik partiyasidan O‘zbekiston Respublikasi Prezidentligiga nomzod Maqsuda Vorisova Surxondaryo viloyati saylovchilari bilan uchrashdi.

Uchrashuvda nomzod Maqsuda Vorisova vohalik saylovchilarni saylovoldi dasturidagi ustuvor yo‘nalishlar bilan tanishtirdi. Dasturdan joy olgan mamlakatda ijtimoiy tenglik va xalq demokratiyasi mezonlariga mos keladigan davlat va jamiyat barpo etish, davlat boshqaruvi, iqtisodiyot, qishloq xo‘jaligi, tadbirkorlik, ta'lim, tibbiyot, madaniyat, qonun ustuvorligini ta'minlash, tashqi siyosat masalalariga doir ustuvor yo‘nalishlar xususida batafsil ma'lumot berildi.

Ma'ruzada aholini sifatli oziq-ovqat mahsulotlari, kundalik ehtiyoj bilan bog‘liq hamyonbop tovar va xizmatlar, arzon uy-joy va kommunal xizmatlar bilan ta'minlash, aholining kam ta'minlangan qatlamlariga bepul, sifatli va to‘laqonli birlamchi tibbiy yordam ko‘rsatish, yoshlarning kasb-hunar tanlashi, bepul va sifatli ta'lim olishi, aholining ijtimoiy himoyaga muhtoj qatlami, nogironligi bo‘lgan shaxslarni qo‘llab-quvvatlash, ular uchun imkoniyatlar ko‘lamini kengaytirish mexanizmlarini takomillashtirish, Muruvvat va Mehribonlik uylari faoliyatini yanada yaxshilash borasida takliflar bildirildi.

Dasturda Surxondaryo viloyatini jadal rivojlantirish, xalqning turmush farovonligini oshirish bo‘yicha ham chora-tadbirlar belgilangan. Jumladan, mahalliy hokimliklar darajasida hayot uchun muhim va xavfsiz oziq-ovqat mahsulotlar hamda kundalik zarur tovarlarni ishlab chiqarish bo‘yicha o‘rta muddatli hududiy dasturlar shakllantirilishi, mahsulotlarni to‘liq qayta ishlovchi korxonalar tizimi yaratilib, paxta, ipak, jun, charm va zig‘irdan xaridorgir mahsulotlar ishlab chiqarish orqali qishloq tumanlariga sanoat olib kirilishi lozimligi ta'kidlandi.

Tadbirda so‘zga chiqqanlar nomzodning dasturida mamlakatni har tomonlama taraqqiy ettirish, barcha yo‘nalishdagi islohotlarning ijtimoiy samaradorligini oshirish, aholi turmush darajasini yuksaltirish, demokratik o‘zgarishlarni chuqurlashtirish va fuqarolik jamiyatini rivojlantirishga qaratilgan eng muhim masalalar qamrab olinganini ta'kidlab, O‘zbekiston Prezediyenti saylovida Maqsuda Vorisova nomzodini qo‘llab-quvvatlashlarini ma'lum qildilar.

O‘zbekiston Xalq demokratik partiyasi
Axborot xizmati Ⓣ

Top