21:24 / 03.10.2021
4575
Yaponiya hukumati to‘liq tarkibda iste'foga chiqdi
Yaponiya bosh vaziri Yosixide Suga

Yaponiya bosh vaziri Yosixide Suga hukumati 4 oktyabrda to‘liq tarkibda iste'foga chiqdi. Bu mamlakat parlamenti yangi bosh vazirni tanlashi oldidan yuz berdi. Bosh vazir lavozimini hukmron partiya yetakchisi Fumio Kisida egallashi kutilmoqda. Endilikda aynan u hukumatni yangidan shakllantiradi.

Avvalroq Yaponiyaning hukmron Liberal-demokratik partiyasining yangi yetakchisi 4 oktyabrda lavozimini bajarishga kirishishi ma'lum qilingandi. Bosh vazirning tasdiqlanishi ko‘proq rasmiy ko‘rinishga ega bo‘lib, mamlakatda o‘rnatilgan an'anaga ko‘ra, ushbu lavozimni odatda hukmron partiya yetakchisi egallaydi.

Kisida Yaponiyaning 100-bosh vaziri bo‘ladi.

Shuningdek, hukumat bosh kotibi lavozimini Xirokadzu Matsuno egallaydi. Avvalgi hukumatdan tashqi ishlar vaziri Tosimitsu Motegi va mudofaa vaziri Nobuo Kisi o‘z lavozimlarini saqlab qoladi.

Avvalroq Yaponiyada Suga vakolatlari muddati yakunlangani sababli Liberal-demokratik partiya yetakchisi saylovlari bo‘lib o‘tgandi. Suga bosh vazir lavozimini Sindzo Abe o‘z sog‘lig‘idagi muammolar sababli kutilmaganda iste'foga chiqishini e'lon qilgandan keyin egallagandi. Suganing o‘zi partiya yetakchisi uchun saylovlarda ishtirok etishdan bosh tortgan.

Mavzuga oid
Top