Yaponiya bosh vaziri muddatidan oldin parlament saylovlari o‘tkazilishini e’lon qildi

Yaponiya bosh vaziri Sanae Takaiti 8 fevral kuni muddatidan oldin parlament saylovlari o‘tkazilishini e’lon qildi. Shu maqsadda 23 yanvar kuni parlamentning quyi palatasi tarqatib yuboriladi, deya dushanba, 19 yanvar kuni Tokioda 64 yoshli hukumat rahbari ma’lum qildi. Takaiti hokimiyatga kelganiga endigina uch oy bo‘lgan.

Shu tariqa Yaponiya milliy-konservatorlari yetakchisi o‘zining juda yuqori reytingiga tayanib, koalitsiyasi tarkibidagi Liberal-demokratik partiya (LDP) va konservativ-neoliberal «Yaponiyani yangilash jamiyati» partiyasiga tegishli parlament ko‘pchiligini oshirishga umid qilmoqda. Yapon OAV ma’lumotlariga ko‘ra, hozir saylovchilarning 70 foizdan ortig‘i Takaiti partiyasini qo‘llab-quvvatlamoqda.

Bundan tashqari, hukumat rahbari budjet xarajatlarini ko‘paytirish va soliqlarni kamaytirish hisobiga iqtisodiy o‘sishni ta’minlash rejalari, shuningdek, Yaponiyaning yangi mudofaa strategiyasi bo‘yicha masalalarni amalga oshirishda saylovchilar qo‘llab-quvvatlovini mustahkamlashni maqsad qilgan. «Bu saylovlarga men bosh vazir sifatida siyosiy kelajagimni tikyapman. Men jamoatchilik mamlakatni boshqarishni menga ishonib topshiradimi-yo‘qmi — bevosita hal qilishini istayman», — dedi u.

Sanae Takaiti oktyabr oxirida Yaponiya hukumati rahbari lavozimiga kelgan ilk ayol kishi bo‘ldi. Shuningdek, u so‘nggi besh yil ichida Yaponiyaning to‘rtinchi bosh vaziriga aylandi.

1955 yildan beri Yaponiyada deyarli uzluksiz hokimiyatda bo‘lib kelgan Liberal-demokratik partiya (LDP) oxirgi paytlardagi mojarolar fonida parlamentning har ikki palatasida ham ko‘pchilikni yo‘qotgan. Oktyabr oxirida esa LDPning 26 yil davomidagi koalitsion sherigi bo‘lgan o‘ng markazchi «Komeyto» partiyasi Takaitining partiyalarni moliyalashtirish va xavfsizlik siyosati bo‘yicha qat’iy pozitsiyasi sabab koalitsiyadan chiqib ketgan.