Ikki hamqishloqning janjaliga avvalroq do‘konda spirtli ichimliklar borasida gap talashib qolgani sabab bo‘lgan.
Jizzax viloyati G‘allaorol tumanida hamqishlog‘ining oldiga borib mushtlashgan erkak halok bo‘lgan. Bu haqda viloyat IIB axborot xizmati xabar bermoqda.
Ma’lum qilinishicha, G‘allaorol tumani “Mulkush” MFYda yashovchi, 1986 yilda tug‘ilgan fuqaro hamqishlog‘i bilan orani ochiq qilish maqsadida uning fermer xo‘jaligi dalasiga borgan.
Shu yerda ular mushtlashgan. Oqibatda orani ochiq qilish uchun borgan fuqaro tan jarohatlari olib, hushini yo‘qotgan. Shundan so‘ng fermer uni daladan uyiga olib borgan va xotiniga topshirgan. Ko‘p o‘tmay u vafot etgan
O‘tkazilgan sud tibbiy ekspertizasi fuqaroning o‘limiga bosh miya to‘qimalariga qon quyilishi, chap tomon ikkinchi, o‘n birinchi, o‘ng tomon oltinchi hamda o‘n birinchi qovurg‘alar, chap buyrak va taloq yorilishi sabab bo‘lganini ko‘rsatgan.
Fuqaroning o‘limiga sabab bo‘lgan fermer tegishli tartibda hibsga olingan.
Surishtiruvlarda aniqlanishicha, ikki hamqishloqning janjaliga 2023 yil 15 aprel kuni do‘konda spirtli ichimliklar borasida gap talashib qolgani sabab bo‘lgan.
