Отабек Сатторий иши. Жабрланувчининг адвокати журналистларга чора кўриш бўйича судга илтимоснома киритди

Жабрланувчиларнинг адвокати судьяга суд жараёнини тўғридан тўғри видеога олиб ижтимоий тармоқларда ва интернетнинг бошқа ресурсларида тарқатишни тақиқлаш ва сайтлардан бирига аввалги суд мажлисида жараённи тўғридан тўғри видеога олиб тарқатгани учун чора кўришни сўради. Бу ҳақда суд мажлисида қатнашаётган Kun.uz мухбири хабар берди.

Жабрланувчиларнинг адвокатига кўра, журналистлар ва блогерлар суд мажлисини видеога олиб жонли эфирда интернетга тарқатганлиги натижасида ижтимоий тармоқларда жабрланувчиларга нисбатан инсон шаъни, қадр-қимматини таҳқирловчи кўплаб изоҳлар қолдирилган. Шу сабабли адвокат суд мажлисидан жонли эфир тарқатган сайтлардан бирининг журналистларига нисбатан чора кўриш бўйича илтимоснома киритди.

Суд мажлисига раислик қилувчи судья адвокатнинг илтимосномасини қисман қаноатлантирди. Блогер ва журналистларга суд мажлисини тўғридан тўғри эфирга узатишни тақиқланди. Суд мажлисининг аввалида жабрланувчилар сўроқ қилинмоқда.

Аввалроқ, Отабек Сатторий иши бўйича тергов якунлангани, блогер Жиноят кодексининг 3та моддаси билан айбланаётгани хабар қилинганди. Тергов департаментининг маълум қилишича, жиноят ишини тергов қилиш жараёнида Отабек Сатторий саккиз нафар фуқаронинг сир сақланиши лозим бўлган маълумотларини ошкор қилиш билан қўрқитишда, бу орқали моддий манфаат кўриб келганликда, фуқароларга Telegram, Facebook, YouTube орқали туҳмат қилиш, ҳақорат қилиш каби жиноятларни содир қилганликда айбланган.