Тошкентда Келес йўли кўчасини кенгайтириш учун 15 та кўчмас мулк объекти олиб қўйилади

Тошкент шаҳри Олмазор туманидаги Келес йўли кўчасини кенгайтириш ва реконструкция қилиш, атрофни ободонлаштириш ишлари муносабати билан жисмоний ва юридик шахсларга тегишли 15 та кўчмас мулк объекти жамоат эҳтиёжлари учун олиб қўйилади.

Мулклар олиб қўйилишидан олдин мулкдорлар билан нотариал тартибда келишув битими имзоланиб, келишилган ҳолда компенсация тўлаб берилиши кўзда тутилган. Бу ҳақдаги қарор халқ депутатлари Тошкент шаҳар кенгаши томонидан 16 октябрда қабул қилинди.

Қарорда ёзилишича, бу масалада мулкдорлар билан очиқ муҳокама ўтказилган. Ҳужжатда кўчани кенгайтириш ва реконструкция қилиш, атрофни ободонлаштириш ишлари 2023 йил охиригача тугатилиши кўрсатилган.

Ғалаба боғидан Тошкент ҳалқа автомобил йўлигача бўлган 3,1 километр йўлни босқичма-босқич реконструкция қилиш бошлангани ҳақида Тошкент шаҳар ҳокимлиги 2023 йил январида хабар берган эди. Йўлнинг қатнов қисмидаги чизиқлар сони асосан 6, баъзи жойларда лойиҳа ечимидан келиб чиқиб 11 тагача бўлиши кўзда тутилган.

Расмий хабарда йўлнинг кенгайишига олиб келадиган реконструкция “тирбандликларни камайтиришга қаратилгани” айтилганди. Лойиҳа техник директори Комил Тўлагановга кўра, кўча фойдаланишга топширилганидан кейин тиғиз вақтларда ундан аввалгига қараганда 15-20 фоизгача кўп автомобил ҳаракатланиши мумкин бўлади.

Қайд этиш лозим, жамоатчилик йўлларни кенгайтиравериш тирбандликларга ечим бўлмаслиги, аксинча, муаммони баттар оғирлаштириши, бу нафақат дунё шаҳарларида, балки Тошкентнинг ҳам ўз тажрибасида кўриниб турганини таъкидлаб келади.

Урбанист Аркадий Гершман Келес йўли лойиҳасидан ҳафсаласи пир бўлганини айтган, лойиҳани “кўчани кенгайтиришни қандайдир замонавий нарса деб кўрсатиш бўйича навбатдаги уриниш” деб атаган. “Тошкентнинг навбатдаги йўл лойиҳасини кўриб, додлаяпман – лойиҳадан лойиҳага бир хил хатоларни такрорлашяпти”, – деган у.

Келес йўли кўчасини реконструкция қилиш билан Grand Road Tashkent компанияси шуғулланмоқда. Компания лойиҳани 103,6 млрд сўмга баҳолаган.

Ушбу пудратчи бунгача пойтахтнинг бир қатор кўчалари, хусусан Фарғона йўли ва Алишер Навоий проспектларини реконструкция қилган, бир нечта йўлўтказгичлар қурган. 2021 йилда компания томонидан учта йўл ўтказгич ва йўллар қурилиши қиймати 280 млрд сўмдан 518,3 млрд сўмгача қимматлашгани ОАВ эътиборини тортган эди.