Navoiy ko‘chasini Ortiqxo‘jayevga aloqador kompaniya ta’mirlayotgan bo‘lishi mumkin

14 fevral kuni poytaxtning Alisher Navoiy shohko‘chasida ta’mirlash ishlari boshlandi. Ta’mirlash haqida avvalroq ma’lumot berilmagani sabab, odamlar avvaliga nima bo‘layotganini tushuna olmadi. Keyinroq ma’lum bo‘lishicha, shahar hokimligi Navoiy ko‘chasini boshidan oxirigacha butkul rekonstruksiya qilishni boshlab yuborgan.

Jamoatchilik muhokamasidan o‘tkazilmagan rekonstruksiya loyihasi e’tirozlarga sabab bo‘ldi. Chunki loyihada ilmiy xulosalar va prezident topshiriqlariga zid ravishda ustuvorlik piyodalarga emas, yana avtomobillarga berilgan.

Avvalroq poytaxtga tramvaylar qaytishi e’lon qilingani inobatga olinsa, u qaysi ko‘chalardan o‘tishini aniq belgilamay turib rekonstruksiya boshlash yana behuda pul sarflashga sabab bo‘lishi mumkin.

Yo‘lni kim qurmoqda?

Toshkent shahar hokimligi matbuot xizmati Kun.uz so‘roviga javoban Navoiy ko‘chasini rekonstruksiya qilish qaysi kompaniyaga topshirilgani hamda loyihaga qancha mablag‘ yo‘naltirilgani haqida ayni damda matbuot xizmatida ma’lumot yo‘qligini ma’lum qildi.

Kun.uz manbasining so‘zlariga ko‘ra, yo‘llarni qayta rekonstruksiya qilish ishlari Toshkent shahar hokimligi qoshidagi «Yagona buyurtmachi xizmati» IK buyurtmasiga muvofiq Grand Road Tashkent MChJga topshirilgan.

Yuridik shaxslar reyestriga ko‘ra, mazkur kompaniya yo‘llar va shosselar qurish bilan shug‘ullanadi. Grand Road Tashkent'ning 62,1 foiz ulushi Grandway in kompaniyasiga tegishli (Grandway İnşaat Yatırım Anonim Şirketi – turk kompaniyasi). Korxonaning 37,9 foiz ulushiga esa Toshkent shahar hokimligi munitsipial markazi aktivlarni boshqarish markazi egalik qiladi.

«Toshkentdagi ko‘plab yo‘llar ta’mirini asosan shu kompaniya amalga oshirgan. Buyurtmachi esa shahar hokimligining yagona injiniring kompaniyasi», – deydi manba.

2018 yilda tashkil etilgan kompaniya co‘nggi bir yil ichida Toshkentdagi ko‘plab yo‘llar qurilishi va rekonstruksiya ishlarini amalga oshirgan. Xususan, Sergeli tumanida Qumariq ko‘chasi rekonstruksiyasi, Sergeli tumanidagi 6 qatorli yo‘l qurilishi, Ahmad Donish ko‘chasi bo‘ylab Nurafshon ko‘chasigacha bo‘lgan yo‘lning kapital ta’miri, Cho‘ponota, KXAY, THAY va Qipchoq ko‘chalari o‘rtasida olti qatorli yo‘l va 3ta yo‘l o‘tkazgich qurish, Farg‘ona yo‘li ko‘chasi rekonstruksiyasi (2021 yil mart oyida yakunlangan) kabilar shular jumlasidan.

Hozircha kompaniya rasmiy sahifasida muhokamalarga sabab bo‘layotgan yo‘l qurilishini boshlagani haqida ma’lumot yo‘q. Kun.uz kompaniya ofisi bilan bog‘lanib, bu borada aniq javob ololmadi.

Jahongir Ortiqxo‘jayev va yana manfaatlar to‘qnashuvi ehtimoli

Orginfo.uz saytidan ko‘rinishicha, Grand Road Tashkent – poytaxt hokimi Jahongir Ortiqxo‘jayevning J-United Group kompaniyasiga tegishli savdo belgisi hisoblanadi.

Grand Road Tashkent'ning Facebook'dagi sahifasida 2021 yil 9 iyun kuni qoldirilgan postda, 5ta kompaniya – Grand Road Tashkent, Durable Beton, Allergo Developed Project, City Net va Constant Chemicals – Durable Group holding tarkibiga kirishi ma’lum qilingan.

Ochiq ma’lumotlarga ko‘ra, Durable Group savdo belgisi ham Jahongir Ortiqxo‘jayev egalik qiladigan J-United Group MChJga qarashli. O‘tgan yili shaharda davlat buyurtmalari asosida qilingan ko‘plab ta’mirlash ishlarida Durable Beton ishlab chiqargan bruschatkalardan foydalanilgan, ayrim holatlarda hatto ta’mirga hojat bo‘lmagan joylarda ham eski bruschatkalar ustiga yangilari terib ketilgan edi.

Hokimga aloqador kompaniyalar hokim boshqarayotgan davlat idorasi bo‘ysunuvidagi korxonadan ko‘plab buyurtmalar olayotgani davomli ravishda manfaatlar to‘qnashuviga yo‘l qo‘yib kelinayotganini ko‘rsatishi mumkin.

Ayni paytda, Grand Road Tashkent va Durable Beton kompaniyalari qo‘lga kiritgan o‘nlab davlat buyurtmalarining qiymati qanchaligi haqida ma’lumot yo‘q.

Shunisi ma’lumki, Toshkent shahar hokimiga aloqador boshqa bir firma – Eco House-Group tibbiyot sohasiga oid kamida 403 mlrd so‘mlik loyihalarni tendersiz olgan. Kun.uz bu haqda bergan xabarida «Davlat xaridlari to‘g‘risida»gi qonunga binoan 6,8 mlrd so‘mdan oshiq loyihalarni tendersiz berish taqiqlanganiga e’tibor qaratgandi.

Bugun, 16 fevral kuni Toshkent shahar hokimligi Navoiy ko‘chasidagi rekonstruksiya ishlari yuzasidan matbuot anjumani ztkazadi. Unda jurnalistlarni uncha xushlamaydigan shahar hokimi Jahongir Ortiqxo‘jayev ishtirok etsa, qator savollarga  oydinlik kiritilsa ajab emas.