Бу Ўзбекистон пойтахтида бир ҳафта ичида кузатилган ва Россия фуқаросининг ўлими билан тугаган иккинчи ҳолат ҳисобланади.
13 март куни Тelegramʼда Миробод туманидa номаълум эркак кўп қаватли бинодан тушиб кетиб, ерда ҳаракатсиз ётгани акс этган видео тарқалди.
Қайд этилишича, ҳодиса 18:30 да содир бўлган.
27 яшар эркак пойтахтнинг Миробод тумани Буюк Турон кўчасидаги 75-уйнинг еттинчи қаватидаги хонадондан ўзини пастга ташлаган. У олган жароҳатлари оқибатида воқеа жойида жон берган.
Бош прокуратура баёнотида марҳумнинг Россия Федерацияси фуқароси экани таъкидланади.
«Текшириш доирасида суд-тиббий экспертизаси тайинланган. Шунингдек, содир бўлган ҳодисанинг сабаблари аниқланмоқда», дейилади Ўзбекистон бош прокурорининг матбуот котиби Ҳаёт Шамсуддинов томонидан эълон қилинган баёнотда.
8 март куни 37 яшар россиялик журналист, «Бюллетень кинопрокатчика» нашри бош муҳаррири Александр Нечаев Тошкентдаги квартирасида жонсиз ҳолда топилганди. Ўзбекистонга бир неча ой олдин келган эркакнинг ўлими сабабини аниқлаш учун суд-тиббий экспертизаси тайинланганди.
Ўзбекистон бош прокуратурасига кўра, марҳумнинг танасида жароҳатлар аниқланмаган. Шунингдек, у қотиллик қурбони бўлгани истисно этилди. Суд-тиббиёт экспертизасининг дастлабки хулосасига кўра, журналистнинг ўлими «сурункали юрак-ўпка етишмовчилиги, юракнинг сурункали ишемик касаллиги»дан келиб чиққан.
