Путин илк марта Трампнинг тинчлик режасига муносабат билдирди

Россия президенти Владимир Путин АҚШ президенти Доналд Трамп маъмурияти томонидан тақдим этилган тинчлик режаси Россия-Украина урушини тинч йўл билан ҳал қилиш учун асос бўлиши мумкинлигини айтди. Бу ҳақда у 21 ноябрь куни Россия Хавфсизлик кенгашида сўзлаган нутқида маълум қилди.

Путиннинг таъкидлашича, Россия АҚШ тинчлик режаси матнини олган, бироқ у Россия томони билан «батафсил» муҳокама қилинмаган. Унинг фикрича, бунинг сабаби – Украина ҳозирча бу таклифларга розилик бермагани.

«Биз Аляскадаги музокаралардан сўнг Америка томонида маълум бир танаффус бўлганини кўришимиз мумкин. Ва биз биламизки, бу Украинанинг президент Трамп таклиф қилган тинчлик режасидан амалда воз кечиши билан боғлиқ. Ўйлайманки, шунинг учун унинг янги таҳрири, яъни 28 банддан иборат модернизация қилинган режаси пайдо бўлди», деди Путин.

«Бизда бу матн бор. Биз уни Америка маъмурияти билан мавжуд алоқа каналлари орқали олдик. Ўйлайманки, у якуний тинчлик келишувига асос бўлиши мумкин. Аммо бу матн мавзу жиҳатидан, мазмунан биз билан муҳокама қилинмади. Сабабини тахмин қилишим мумкин. Менимча, бунинг сабаби аввалгидек – АҚШ маъмурияти ҳали ҳам Украина томонининг розилигини ололмаяпти. Украина қарши», деди Россия етакчиси.

«Афтидан, Украина ва унинг Европадаги иттифоқчилари ҳали ҳам саробда ва Россияни жанг майдонида стратегик мағлуб этишни орзу қилмоқда. Ўйлайманки, бундай позициянинг асосида компетенциянинг паст даражаси эмас (ҳозир масаланинг бу томонини муҳокама қилмайман), балки, эҳтимол, бу позиция жанг майдонидаги ҳақиқий вазият ҳақида объектив маълумотларнинг йўқлиги билан боғлиқ», деди Путин.

Аввалроқ, Axios нашри Доналд Трамп маъмуриятининг Украинадаги урушни тўхтатиш режасини эълон қилди. Нашр ҳужжатни қоралама вариант деб атаган, шу билан бирга, унинг ҳақиқийлигини Украина ва АҚШ расмийлари тасдиқлаган. Ҳужжат 28 банддан иборат ва Украинадан бир қатор ён беришларни талаб қилади.

Евроиттифоқ мамлакатлари Украина можаросини ҳал қилиш бўйича АҚШ илгари сураётган режага қарши чиқмоқда. Чунки унда ҳудудий ён беришлар ва Украинанинг қисман қуролсизланиши кўзда тутилган.

Ўз навбатида Украина президенти Володимир Зеленский Вашингтон билан АҚШ маъмуриятининг янги тинчлик режаси устида ишлашга тайёрлигини билдирди.