Мюнхен полициясининг дастлабки маълумотларига кўра, отишмани содир этган шахс ёнида портловчи моддалар ёки винтовка бўлмаган. Унинг рюкзагини текширган мутахассислар шундай хулосани тақдим этишган. 

Бу ҳақда, шаҳар полицияси раҳбари Хубертус Андре матбуот анжуманида маълум қилди. Унинг сўзларига кўра, отишманинг бошқа ҳолатлари сингари винтовка ҳақидаги хабар ҳам ўз тасдиғини топмаган. 

Маълум қилинишича, қуролланган номаълум шахс McDonalds ресторанида отишмани бошлагач, қўшни «Олимпия» савдо марказига ўтган. Бу пайтга келиб, ҳуқуқ-тартибот идоралари ходимлари етиб келишган. 

Кейинчалик аниқланишича, жиноятни асли эронлик 18 яшар йигит содир этган. Унинг бу қилмишига нима сабаб бўлгани маълум эмас.