IShID rahbarlarining Iroq provinsiyasidagi uchrashuvi janjal va otishmalar bilan tugadi

IShID rahbarlarining maxfiy uchrashuvi o‘zaro janjal va otishmalar bilan tugadi. Bu haqida The Daily Star xabar berdi. 

"Xashd ash-Shaabiy" shia ayirmachilari vakili Jabbor Mamuriyning ma'lum qilishicha, IShID yetakchilari yo‘qotishlardan keyingi taktik va strategik rejalarni kelishib olish uchun Iroqdagi Diyala va Salohuddin provinsiyalari o‘rtasida joylashgan, nazorat ostidagi hududda to‘planishgan.

Mamuriyning so‘zlariga ko‘ra, uchrashuvda IShIDning mahalliy arab millatiga mansub va boshqa yetakchilari (millatiga aniqlik kiritilmagan) o‘rtasida janjal chiqib, otishmaga aylanib ketgan. Manbaga ko‘ra, kamida bir nafar IShID rahbari o‘ldirilgan, 3 nafar  raqibi esa jarohat olgan.

Ma'lumotlarga ko‘ra, so‘nggi paytlarda IShID jangarilari orasida katta yo‘qotishlar bo‘layotgani, nazorat ostidagi hududlar qisqarayotgani va moliyaviy xarajatlar ko‘paygani sabab guruh rahbariyatida tez-tez ziddiyatlar kuzatilmoqda.