Россиянинг Саратов вилоятидаги Татищевск туманида автобус қулаши натижасида 15 нафар киши жабрланди, бир киши шифохонага ётқизилди. Бу ҳақида РИА "Новости" фавқулодда хизматлардаги манбасига таяниб, хабар берди.

"Ичида 24 киши бўлган автобус Карякино қишлоғи ёнидаги чуқурликка қулаб кетган. Дастлабки маълумотларга кўра, бир киши умуртқа поғонасидан жиддий жароҳат олганлиги тахмин қилиниб, шифохонага етказилди", - деди агентлик суҳбатдоши. 

"Жами 15 нафар киши жабрланди", - қўшимча қилди у ва кўпчиликда кичик жароҳатлар қайд этилганини таъкидлади. Унинг сўзларига кўра, автобусда Ўзбекистон фуқаролари ҳам бўлган.