"Формула-1"нинг Хитой гран-приси пайшанба куни Шанхайда бошланади. "Феррари" жамоаси Мельбурндаги муваффақиятдан сўнг ғалабали серияни давом эттириш ва мавсум фаворити "Мерседес" билан кураш олиб боришга умид қилмоқда.

Хитой гран-приси Шанхайдаги автодромда 7-9 апрель кунлари бўлиб ўтади. Биринчи босқичдан сўнг умумий жадвалда "Феррари" пойгачиси Себастьян Феттель (25 очко) етакчилик қилмоқда, иккинчи ўринда "Мерседес" вакили Льюис Ҳэмилтон бўлса, учинчи поғонада унинг жамоадоши Вальттери Боттас (15) бормоқда.

"Феррари" VS "Мерседес"

"Феррари" чемпионатнинг биринчи босқичидаёқ мавсумолди тестлар натижалари ва мутахассислар башорат асоссиз бўлмаганини кўрсатди, ҳамда бу мавсумда нафақат жаҳон чемпионлиги учун, балки конструкторлар Кубоги учун ҳам кураш олиб боришга умид қилмоқда.

Шу билан бирга, чемпионат етакчиси жуда камтарона изоҳлар берган. "Соврин учун пойга жуда узун йўлдан иборат. Айни дамда Австралиядаги муваффақиятдан кейин еттинчи осмонда сузиб юргандекмиз, гўё. Менинг стартдан унчалик кўнглим тўлмади, бироқ босим ўтказишга интилдим ҳамда кураш олиб боришга тайёр эканлигимни кўрсатиб қўйдим. Бироз омад ҳам ёрдам берди", - дея айтиб ўтди Феттель.

Статистикани ёдга олган ҳолда шуни таъкидлаб ўтиш жоизки, айнан "Феррари" ва "Мерседес" айни дамда Хитой Гран-присидаги ғалабалар сони бўйича бир хил кўрсаткичга эга – бу жамоалар Шанхайда тўрт бора ютишган. Шанхайда тўрт марта тенгсиз бўлган Ҳэмилтонга трасса Феттелдан Мельбурндаги мағлубият учун қасос олишга яхши имконият беради.

Хитой Гран-присидаги биринчи ва иккинчи эркин амалиётлар Шанхайда жума куни бўлиб ўтади, улар Тошкент вақти билан 07:00 ва 11:00да ўтказилади. Учинчи эркин амалиёт эса 8 апрель куни ўтказилади ва Тошкент вақти билан 09:00да бўлиб ўтади, шундан сўнг саралаш баҳсларини ўтказиш режалаштирилган. Пойга эса 9 апрелга мўлжалланган ҳамда Тошкент вақти билан 11:00да бошланади.