Tahlillar Suriyaning Xan-Shayxun shahriga kimyoviy hujum vaqtida zarin yoki shunga o‘xshash kimyoviy modda qo‘llanganini isbotladi. Bu haqda Kimyoviy qurolni taqiqlash tashkiloti saytida chop etilgan bayonotda aytilgan.
"Tahlillar natijalari qurbonlar zarin yoki shunga o‘xshash modda ta'siriga uchraganlarini ko‘rsatdi", deyilgan xabarda.
Ushbu hujumning tafsilotlarini o‘rganish bo‘yicha missiya ishini davom ettirmoqda. Tashkilot bosh direktori Axmet Uzyumdjyuning ta'kidlashicha, agar xavfsizlik sohasidagi vaziyat imkon bersa, missiya Xan-Shayxunga jo‘nashga tayyor. Missiya ikki hafta ichida Kimyoviy qurolni taqiqlash bo‘yicha konvensiyaga a'zo davlatlarga birinchi hisobotni taqdim qilishi kutilmoqda.
Xan-Shayxundagi kimyoviy hujum 4 aprelda amalga oshirilgan. Rossiya mudofaa vazirligi ma'lumotlariga ko‘ra, Suriya armiyasi jangarilar zaharli moddalar ishlab chiqaruvchi sexni bombardimon qilgan. Vashington esa Damashqni tinch aholiga qarshi kimyoviy hujum sodir etganlikda ayblagan hamda bunga javoban Suriyadagi Shayrat aerodromiga raketa zarbasi bergan. Amerikalik mutaxassislarning fikricha, kimyoviy hujumni amalga oshirgan samolyotlar aynan shu aerodromdan havoga ko‘tarilgan.
