Бутунжаҳон бокс серияси (WSB)нинг VII мавсум «C» гуруҳида иштирок этиб келаётган Ўзбекистоннинг Uzbek Tigers жамоаси 21 апрелда Россиянинг Patriot Boxing Team жамоасига қарши рингга кўтарилиб, чорак финал масаласини ижобий ҳал этди. 

Маълумки, Uzbek Tigers жамоаси «C» гуруҳида Astana Arlans, Patriot Boxing Team ва China Dragons жамоалари билан куч синашди. Ўзбекистонлик чарм қўлқоп усталари Astana Arlans ва China Dragons жамоалари билан меҳмон-мезбон услубида куч синашиб улгурди. Бу баҳслар натижасига кўра, Ўзбекистон боксчилари меҳмонда мағлубиятга учраган бўлса, мезбонда икки жамоадан ҳам реванш ола билди.

21 апрель куни Халқаро ҳаваскор боксчилар уюшмаси – AIBA томонидан ўтказилаётган The World Series Boxing (WSB) - Бутунжаҳон бокс сериялари VII мавсумида иштирок этаётган Uzbek Tigers боксчилари «C»  гуруҳидаги сўнгги учрашувини Patriot Boxing Team жамоасига қарши ўтказди. 

Кейинги босқичга йўлланмани қўлга киритиб бўлган жамоа Пермга иккинчи таркибни олиб кетди. Бу таркиб 2:3 ҳисобида мағлуб бўлди. Мусобақа регламентига биноан, бу кўринишдаги ҳисобни қайд этган ғолиб жамоага 3 очко, мағлуб жамоага 1 очко берилади. Шунга кўра, бунгача 9 очко тўплаган Uzbek Tigers жамоаси россияликлар билан бир хил очко тўплашга эришди. 

Қоидага мувофиқ, гуруҳлардаги энг яхши натижа кўрсатган 2та учинчи ўринни эгаллаган жамоа ҳам кейинги босқичга чиқиши белгиланган. Шундай қилиб, «B» гуруҳида 11 очко билан учинчи ўринни олган France Fighting Roosters ва «C» гуруҳида 10 очко билан учинчи ўринни эгаллаган Uzbek Tigers жамоаси гуруҳдан чиқиш масаласини ҳал этди.