Samsung Galaxy Note 8 смартфонининг макети Хитойдаги WEBO микроблоглар сайтида пайдо бўлди. Galaxy Note 8 макетининг Samsung Galaxy S7 билан таққослангани акс этган видеоси бошқа бир фойдаланувчи томонидан интернет тармоғига қўйилди. Суратга кўра, Samsung компаниясининг янги фаблети тик жойлашган иккита асосий камерага эга бўлади. Бундан ташқари, иккита ёритқичга эга бўлиши эҳтимол. 

Қурилманинг орқа ёки олд томонида бармоқ излари сканерининг йўқлиги ҳам муҳим аҳамиятга эга. Бу шуни англатадики, Samsung сканерни экран остига жойлаштиришнинг уддасидан чиққан. Samsung бармоқ излари сканерини Samsung Galaxy S8 / Galaxy S8 + смартфонларининг орқа панелига камера ёнига жойлаган эди. 

Galaxy Note 8 экрани 6,3 дюйм бўлиши кутилмоқда. У АҚШда Snapdragon 835 процессорларида, бошқа мамлакатларда Exynos 8895 SoC чипсетларида ишлайди. Батареяси 3700 мА*с ҳажмда бўлади. Galaxy Note 8 1-6 сентябр кунлари Берлинда бўлиб ўтадиган IFA-2017 шоусида тақдим этилиши мумкин, деб ёзади PhoneArena.

Қайд этиш жоизки, кейинроқ, Samsung Galaxy Note 8 макетининг видеоси Youtube сайтидан олиб ташланди.