Автомобилни тураргоҳга жойлаш - бошловчи ҳайдовчилар курслари дастуридан ўрин олган илк машқлардан бири. Бироқ бу жараённи машина ичидаги ёки ташқаридаги автоматлаштирилган тизимга ишониб бўлармикан? Stan – Франциянинг Stanley Robotics компанияси муҳандислари томонидан ишлаб чиқилган, автомобилни жойлаштириш жараёнини анча енгиллаштирувчи ноёб робот. Робот тураргоҳга киришда автомобилингизни олиб, уни бўш жойга жойлаштиради.

Stan махсус платформа ёрдамида автони ердан бироз кўтаради. Автомобиль эгаси мобил илова ёрдамида олдиндан тураргоҳдан жой банд қилиши, шунингдек у жойни қачон тарк этишни режалаштираётганини белгилаб қўйиши мумкин, шунда робот кираверишда автомобилни эгасига тахт қилиб қўяди. Бундай роботлар фаолиятининг самарасини ошириш учун бирйўла бир неча шундай автоматлар ишлаши мумкин.

Stanley Robotics компаниясига 2015 йилда асос солинган бўлиб, яқинда у бир неча йирик сармоячилардан ўз лойиҳалари ривожи учун кўп миллионли инвестицияларга эга бўлди. Бугунги кунда Stan Парижнинг Шарль де Голь аэропортида машиналарни тураргоҳга жойловчи бўлиб ишлайди. Айнан шу ерда робот одамларга вақтни тежаш ва асабларни асрашга самарали кўмак беради. Айниқса рейсга кечикаётганлар учун бу айни муддао. Сафардан қайтишда эса йўловчилар автотураргоҳининг кириш қисмида автомобиль эгасини кутиб турган бўлади.