ФИФА Неймар 2013 йилда «Сантос»дан «Барселона»га ўтиш жараёнида ҳеч қандай қонун бузилмагани ҳақида қарор чиқарди. Бу ҳақда Неймарнинг манфаатларини ҳимоя қилувчи N&N Consultoria фирмаси матбуот хизматига асосланиб Globo Esportе хабар берган.

«Сантос» клуби 2015 йилнинг майидаёқ Неймарнинг «Барселона»га ўтиши жараёнида клуб атиги 17 млн еврога эга бўлгани, футболчи ва N&N Consultoria фирмаси эса 58,5 млн еврони қўлга киритганидан норози бўлиб, ФИФАга шикоят қилганди.

Эндиликда Бразилия клуби бу қарор устидан шикоят бериши учун 10 кун муҳлатга эга.

Шу билан биргаликда, футболчининг трансфер ҳуқуқида улушга эга бўлган DIS инвестиция жамғармаси Неймарни жазолашни талаб қилишда давом этмоқда. Бу ташкилот ҳам 2013 йили амалга оширилган ушбу трансфердан ўзи учун етарлича маблағ олмаганини даъво қилади.