Лондонда бўлиб ўтаётган паралимпиячилар жаҳон чемпионатида эркаклар ўртасида енгил атлетиканинг узунликка сакраш бўйича иштирок этган Дониёр Солиев 7.18 м. натижаси билан биринчи бўлиб, навбатдаги олтин медални қўлга киритди. У ўз кўрсаткичи билан Осиё рекордини ҳам янгилаган (Бундан аввалги Осиё рекорди 2015 йили Қатарнинг Доҳа шахрида бўлиб ўтган жаҳон чемпионатида хитойлик Чен Мингю томонидан ўрнатилганди - 7.07м. натижа).

2-ўринни швециялик спортчи Жонсон Тобиас 6.99 м. натижа билан эгаллаган, 3-ўрин 6.77м натижа қайд этган беларуслик Бурдуков Сергейга насиб этди.

Узунликка сакраш мусобақасида жаҳоннинг кучли спортчилари иштирок этди, улардан паралимпия чемпиони ва рекордчиси Лангенҳовен Ҳилтон ҳам иштирок этди.  

Эслатиб ўтамиз, мазкур чемпионат 10 кун давом этади ва 1050 нафар спортчи 213та медалли ўринлар учун куч синашмоқда. Шулар орасида ўзбекистонлик спортчи Ҳусниддин Норбеков 15 июль куни 54.73 натижа билан биринчи ўринни эгаллаб, иккинчи маротаба жаҳон чемпиони унвонини қўлга киритган эди. Абдурашидов Мансур 16 июль куни 100м.га югуриш бўйича финал босқичига чиқа олмади. Ўзбекистон вакиллари ядро улоқтириш, найза отиш ва югуриш мусобақаларида иштирок этишади.