08:47 / 26.07.2017
29322

Tojikiston hukumati o‘zbek-tojik boks ustalarining sport tomoshasini bekor qildi

Tojikiston poytaxti Dushanbe shahri ma'muriyati o‘zbekistonlik boks ustalari ishtirokidagi katta boks tomoshasini bekor qildi. Avval xabar berganimizdek, Maqsud Jumayev, Alisher Habibullayev, Humoyun Rustamov ishtirokidagi katta sport shousi shaharning "Ahorun" amfiteatrida 29 iyulda bo‘lib o‘tishi rejalashtirilgan edi. 

Tojikiston professional boks federatsiyasining ma'lum qilishicha, tashkilot tomoshani o‘tkazishga ruxsat ololmagan. Dushanbe ijroiya hokimiyati maktubida qayd etilishcha, «Ahorun» madaniy-ko‘ngilochar davlat korxonasi sport musobaqalarini o‘tkazishga mo‘ljallanmagan. Shu munosabat bilan O‘zbekiston va Tojikiston professional charm qo‘lqop ustalarining janglarini sport zallarida o‘tkazish tavsiya etilgan. 

Shunga ko‘ra, Dushanbedagi «Ahorun» amfiteatridagi boks kechasi bo‘lib o‘tmaydi. Ayni vaqtda Tojikiston professional boks federatsiyasi janglarni boshqa maydonda o‘tkazish choralarini ko‘rmoqda. 

Top