«Iks-variantlar bo‘lmagan va bo‘lmaydi ham». DTM vakili barchasini inkor etdi

Davlat test markazi 1 avgust kuni o‘tkaziladigan imtihonlar oldidan abituriyentlarni ishontirishicha, hech qanday iks-variantlar mavjud emas, imtihonlar uchun tayyorlangan testlarning javoblari chiqarib yuborilmagan.

Davlat test markazi bo‘lim boshlig‘i Qayum Boymirov bugun bo‘lib o‘tgan «O‘zbekiston» telekanalining «Biz uchun muhim» tok-shousi vaqtida huquqshunos Xushnud Xudayberdiyevning savoliga javob qaytardi.

Savolda ayni vaqtda abituriyentlar orasida iks-variantlar tarqalgani haqida xabarlar borligi aytilgan, buni markaz qanday izohlashi so‘ralgandi.

«Ishonch bilan aytaman, Davlat test markazida test savollarini tuzadiganlar, tipografiyadagilar, test varaqalarini tayyorlashga jalb etilgan barcha mas'ul shaxslarning xalq bilan muloqoti 25 iyundan boshlab to‘xtatilgan. Test savollari yanada takomillashtirilmoqda. 

Ishonch bilan aytamiz, abituriyentlar va ota-onalar bunday xabarlarga ishonmasligi kerak. Bunga ishonib bo‘lmaydi. Bunday iks-variantlar bundan avval ham bo‘lmagan», dedi Boymirov.

U o‘tgan yillar davomida turli shaxslar «iks-variantlar»ni tayyorlab, aldash yo‘li bilan sotganini ta'kidlagan.

Shuningdek, ko‘rsatuv so‘ngida boshlovchi Barchinoy Jo‘rayeva munozaraga taklif etilgan mas'ullardan 1 avgust kuni bo‘ladigan imtihonlarning shaffof va haqqoniy o‘tishini ta'minlash borasida va'da berishga chaqirdi.

DTM bo‘lim boshlig‘i iks-variantlar chiqmasligiga va'da berdi.