Shavkat Mirziyoyev Samarqandda Islom Karimov haykali ochilishida ishtirok etdi

2 sentabr kuni Samarqand shahrida O‘zbekiston Respublikasining Birinchi Prezidenti Islom Karimovning haykali ochildi. Tadbirda ishtirok etish uchun Samarqandga mamlakat Prezidenti Shavkat Mirziyoyev tashrif buyurdi.

O‘zA xabariga ko‘ra, davlat rahbari dastlab Islom Karimov qabrini ziyorat qildi. Qur'on tilovat qilindi.

Birinchi Prezidentga haykal Registon maydoni yonidagi xiyobonda, Islom Karimov tug‘ilib o‘sgan xonadon yaqinida o‘rnatilgan. Haykalni Shavkat Mirziyoyev va Tatyana Karimova ochib bergan. Ular haykal poyiga gul qo‘yib, Islom Karimovning xotirasiga hurmat bajo keltirgan, O‘zbekiston Davlat madhiyasi yangragan.

Shavkat Mirziyoyev Islom Karimov tug‘ilib o‘sgan xonadonga ham tashrif buyurgan. Qur'on tilovat qilinib, elga ehson dasturxoni yozilgan.

31 avgust kuni Toshkent shahrida Birinchi Prezidentning haykali ochilgan edi.