Шу йилнинг 29 август куни тунда, соат бир яримлар атрофида пойтахтнинг Учтепа туманида икки номаълум шахс 1999 йил туғилган коллеж ўқувчисининг 41 минг сўм пулини ўткир тиғли жисм билан қўрқитиб, тортиб оладилар, деб хабар бермоқда Ўзбекистон Республикаси ИИВ матбуот хизмати.

Туман ички ишлар бошқармаси томонидан олиб тезкор тадбир натижасида, ушбу жиноятни Олмазор туманида яшовчи ҳеч қаерда ишламайдиган 1996 йилда туғилган А.У. ва 1997 йилда туғилган М.А.лар содир этганликлари аниқланиб, ушландилар. 

Мазкур ҳолат юзасидан Ўзбекистон Республикаси Жиноят кодексининг 164-моддаси 2-қисми, яъни босқинчилик жинояти аломатлари билан жиноят иши қўзғатилиб, уларнинг бошқа жиноятларга алоқадорлиги ўрганилмоқда.