Londondagi terakt ijrochisining shaxsi aniqlandi

Politsiya London metrosidagi teraktni amalga oshirgan gumondorning shaxsini aniqladi. Sky News  shu haqida xabar berdi. 

"Xavfsizlik idoralaridagi manbalar videokuzatuv kameralari yordamida "Parsons-Grin" stansiyasida portlash sodir etgan gumondorning shaxsini aniqlaganlari haqida ma'lum qilishdi", - deydi telekanal muxbiri. 

Portlash London metrosining "Parsons-Grin" bekatida odam tig‘iz paytda ro‘y bergan. So‘nggi ma'lumotlarga ko‘ra, teraktdan keyin shifoxonaga joylashtirilganlar soni 29 kishiga yetgan. Jabrlanganlar hayotiga jiddiy xavf yo‘q. 

Politsiyaning ma'lum qilishicha, vagonda qo‘lbola bomba portlab ketgan. Ularning so‘zlariga ko‘ra, yo‘lovchilar tezda evakuatsiya qilingan va metro bekati yopilgan.

Parsons-Grin — London g‘arbidagi xorijliklar, talabalar va o‘rtahol britaniyaliklar yashaydigan tuman.