Bosqinchilar jinoyat sodir etilganidan so‘ng qo‘lga olindi

2017 yilning 18 sentabr kuni tungi taxminan soat 04:30larda, A.Yu.R., S.N.T. va K.Sh.A.lar bosqinchilik yo‘li bilan o‘zganing mol-mulkini talon-toroj qilish maqsadida, Yunusobod tumani hududida joylashgan institutning oldida bo‘la turib, fuqaro D.Sh.D.ning yoniga kelib, uni qo‘l va oyoqlari bilan urib, baxosi 945 AQSh dollari bo‘lgan mol-mulki va 1.200.000 so‘m miqdoridagi pullarini egallab olishgan. Bu haqda Toshkent IIBB xabar berdi.

Mazkur holat yuzasidan Yunusobod tumani IIB huzuridagi Tergov bo‘limi tomonidan O‘zbekiston Respublikasi JKning 164-moddasi 2-qismi “b” bandi (bosqinchilik, ya'ni bir guruh shaxslar tomonidan oldindan til biriktirib, o‘zganing mulkini talon-toroj qilish maqsadida hujum qilish) alomatlari bilan jinoyat ishi qo‘zg‘atilgan.

Hozirda dastlabki tergov harakatlari davom ettirilib, ularning boshqa jinoyatlarga aloqadorligi tekshirilmoqda.