Rossiyada dahshatli YTHga uchragan avtobus Qozog‘istondan kelayotgan bo‘lgan

Rossiyaning Vladimir viloyatida yo‘lovchi poyezdi bilan jiddiy YTHga uchragan avtobus Qozog‘istondan kelayotgan bo‘lgan. Bu haqda RIA Novosti Rossiya FVVning Vladimir viloyati bo‘yicha bosh boshqarmasi vakiliga asosan xabar tarqatdi.

Avvalroq jumaga o‘tar kechasi Vladimir viloyatidagi temir yo‘lni kesib o‘tadigan joyda avtobus va poyezd to‘qnashib ketgani xabar qilingandi. Dastlabki ma'lumotlarga ko‘ra, hodisa oqibatida 16 kishi halok bo‘lgan. IIV ma'lumotiga qaraganda, avtobus svetoforning taqiqlovchi chirog‘iga qaramay temir yo‘lni kesib o‘tadigan joyga chiqib ketgan.

"Avtobus Qozog‘iston respublikasiniki, poyezd esa - "Sankt-Peterburg — Nijniy Novgorod", - degan agentlik suhbatdoshi.

Uning so‘zlariga ko‘ra, voqea joyida viloyat FVV boshqarmasining aeromobil guruhi ish olib bormoqda.

Qozog‘iston Tashqi ishlar vazirligi esa bu hodisa bo‘yicha ma'lumotlarni aniqlashtirmoqda. Bu haqda respublika tashqi siyosat idorasining matbuot xizmati rahbari Anvar Jaynakov ma'lum qildi.

"Qozog‘iston TIV ushbu hodisa tafsilotlarini aniqlashtirmoqda", — degan Jaynakov.

Shu bilan birga, uning ta'kidlashicha, hozircha avtobus Qog‘ozistonga tegishliligi yoki halok bo‘lganlar va jabrlanganlar ushbu davlat fuqarosi ekanini yakuniy tarzda tasdiqlay olmaydi.