Yevroittifoqning 117,5 million aholisi qashshoqlik yoqasida

2016 yilda Yevropa Ittifoqi (YeI) mamlakatlaridagi 117,5 million kishi yoki YeI aholisining 23,4 foizi qashshoqlik xavfi va ijtimoiy izolyatsiyaga duch kelishdi. "Anadolu" agentligi YeI Statistika xizmati hisobotiga asoslanib, shu haqida xabar berdi. 

Hisobotda ta'kidlanishicha, qashshoqlik yoki ijtimoiy izolyatsiya xavfi ostidagi odamlar sonini qisqartirish "Yevropa-2020" strategiyasining asosiy maqsadlaridan biri hisoblansa-da, bu ko‘rsatkich o‘sishda davom etmotqda. 

Qashshoqlik xavfi ostida kun kechirayotgan fuqarolar soni bo‘yicha 40 foiz ko‘rsatkich bilan Bolgariya yetakchilik qilmoqda. Undan keyingi o‘rinlarda Ruminiya (38,8 foiz aholi) va Gretsiya (35,6 foiz aholi) qayd etilgan. 

Chexiya YeIning qashshoqlik darajasi eng kam bo‘lgan mamlakati deb topilgan. Bu mamlakatda qashshoqlik yoqasidagi fuqarolar soni 13,3 foizni tashkil qilgan. Undan keyingi o‘rinlarda Finlyandiya (16,6 foiz), Daniya (16,7 foiz) va Niderlandiya (16,8 foiz) nomlari keltirilgan.

Ta'kidlash joizki, Germaniya aholisining 19,7 foizi, Fransiyaning - 18,2 foiz, Italiyaning - 28,7 foiz, Ispaniyaning - 27,9 foiz, Buyuk Britaniyaning - 22,2 foiz, Belgiyaning 20,7 foiz aholisi qashshoqlik va ijtimoiy izolyatsiya xavfsi ostida.