Ҳаётда ҳамма яхши яшашга интилади. Меҳнатга яраша кўп маош олиш кўпчиликнинг орзуси. Бироқ баъзи давлатларда айни кўринишдаги меҳнат турлича баҳоланади. Қуйида оиласиз ва қарамоғида бирор киши бўлмаган ишчи дунёнинг қайси давлатларида юқори маош олиши бўйича Топ-10 мамлакат рўйхати келтирилган. Албатта, рақамлар солиқ ҳамда бошқа ўтказмалар айириб ташланганидан сўнгги қийматни акс эттиради. Демак, 2016 йилда энг юқори маош тўлаган мамлакатлар ўнлиги билан танишинг.

Фото: Getty Images

АҚШ – 41,355 

Америка маҳсулотларни импорт-экспорт қилишда дунёда биринчи ва иккинчи ўринда туради. Шунга мувофиқ, солиқ ҳам ўзига яраша - 31.6 фоизни ташкил этади. Шу билан бирга, америкаликлар рўйхатга киритилган аксар мамлакатлардан фарқли равишда соғлиқ суғуртасига эга бўлишмайди. Солиқлар (кейинги ўринларда ҳам) айириб ташланганидан сўнг, йиллик энг кам даромад 41,355 долларни ташкил этади.

Люксембург – 38,951

Люксембург кимё саноати, резина, саноат машинасозлиги, пўлат ва молиявий хизматлар экспорти бўйича юқори ўринларни эгаллайди. 37.7 фоизлик солиқлар тўланганидан кейин князлик фуқаролари 38,951 долларга эга бўлишади. Бунда улар солиқ ҳисобидан умумий соғлиқ суғуртаси ва бепул таълимга эга бўлишади.
 
Норвегия – 33,492

Норвегияда нефть, минераллар, балиқчилик ва сув энергетикасидан хавотир олишга ўрин йўқ. Умумий саломатлик суғуртаси ва олий таълим Норвегиянинг барча фуқароларига бир хил жорий қилинади. Бу мақсадларга 37 фоизлик солиқдан тушадиган даромадлардан сарфланади. Солиқ миқдори сезиларли бўлганига қарамай, норвегияликлар йилига ўртача 33,492 доллар олади. 

Фото: Fotolia

Швейцария – 33,491

Европанинг қоқ марказида жойлашган мамлакат фуқаролар эркинлиги, турмуш даражасининг юқорилиги, ҳукумат шаффофлиги ва инсон тараққиёти билан ҳақли равишда фахрланади. Швейцария фармацевтика, мусиқий асбоблар, махсус кимё саноати ва аниқ ўлчов ускуналарини ишлаб чиқишда етакчилардан бири. Мамлакат фуқароси ҳафтасига ўртача 35 соат ишлайди. Бироқ улар меҳнат самарадорлиги юқорилиги сабабли йиллик 33,491 доллар даромад кўришини таъминлайди.

Австралия – 31,588

Австралия иқтисодий қудратга эга давлатлардан биридир. Мамлакат нефть, минераллар ва озиқ-овқат маҳсулотларини экспорт қилади. Австралиялик эса, даромадининг 27.7 фоизини солиқ сифатида давлатга тўлайди. Бунинг эвазига бепул тиббий хизмат ва таълимдан баҳра олади. Ҳафтасига 36 соат ишлаган фуқаро йилига 31,588 доллар маош олади.

Германия – 31, 252

Германия сўзсиз Европанинг фахри. У минтақанинг иқтисодий жиҳатдан энг ривожланган мамлакати. Мамлакат фуқаролари жуда катта миқдорда солиқ тўлайди. Улар маошининг 49.8 фоизи ҳукумат жамғармаларига ўтади. Бироқ бу бекорга эмас. Барча даражадаги тиббий ёрдам ва таълим бепул. Бир киши бир йилда ўртача 31,252 доллар даромад кўради. 

Фото: Fotolia

Австрия – 31,173

Европанинг яна бир мамлакати Австрияда сайёҳлик саноати жиддий ривожланган. У миллий иқтисодиётни такомиллаштиришда муҳим ўрин тутади. Аммо бу ерда ҳам солиқ анча юқори - 49.4 фоиз. Шунга қарамай, йиллик ўртача даромад 31,173 доллар атрофида. 

Канада – 29,365

Йирик нефть захиралари ҳақида гап кетганида Канада Венесуэла ва Саудия Арабистонидан кейинги ўринларда туради. Мамлакат, шунингдек, рух, олтин, алюминий ва уран қазиб олиш бўйича етакчи ўринларда. Канадаликлар умумий тиббий суғурта ва умумий таълим учун 31 фоиз солиқ тўлашади. Йиллик даромад 29,365 долларни ташкил этади. 

Швеция – 29,185

Скандинавия қироллиги ташқи савдода анча жиддий ўйинчи ҳисобланади. Мамлакатнинг муҳандислик соҳасидаги ривожи ҳам иқтисодий қудрат ошишига ҳисса қўшмоқда. Аммо мамлакат даромад солиғи юқори мамлакатлар сирасига киради - 42.4 фоиз. Бу билан умумий тиббий суғурта ва таълим бепуллиги таъминланади. Шундан кейин ҳам ишчи тасарруфида 29,185 доллар қолади. 

Фото: Getty Images

Франция – 28,799

Дунёнинг энг ривожланган еттинчи иқтисодиёти фуқароси йилига 28,799 доллар даромад кўра олади. Францияликлар ҳам америкаликлар каби меҳнат самарадорлиги юқори ҳалқлардан биридир.