Shavkat Mirziyoyev Afg‘oniston xalqiga hamdardlik bildirdi

Prezident Shavkat Mirziyoyev 16 avgust kuni Kobul shahridagi “Mavaud” ta'lim markazida sodir etilgan qabih terrorchilik xuruji oqibatida ko‘plab insonlar halok bo‘lgani munosabati bilan Afg‘oniston xalqi va prezident Muhammad Ashraf G‘aniga hamdardlik bildirdi. 

Davlat rahbari matbuot xizmati xabariga ko‘ra, prezident marhumlarning oila a'zolari va yaqinlariga sabr-toqat, jarohatlanganlarga shifo tilagan.

Eslatib o‘tamiz, avvalroq Afg‘oniston poytaxti g‘arbida amalga oshirilgan portlash natijasida kamida 48 kishi qurbon bo‘lgani, 67 kishi jarohatlangani xabar berilgandi. Xudkush terrorchi Dashti-Barchi tumanidagi ta'lim muassasasiga bostirib kirgan va portlash sodir etgan. Halok bo‘lganlarning deyarli barchasi talabalar. Guvohlarning so‘zlariga ko‘ra, hodisa yuz bergan joyda yuzga yaqin kishi bo‘lgan.