Rossiya BMT Xavfsizlik kengashining favqulodda yig‘ilishini chaqirtirdi

Rossiya tomoni Azov dengizidagi vaziyat bo‘yicha BMT Xavfsizlik kengashining favqulodda yig‘ilishi chaqirtirilishini talab qildi. Bu haqda Rossiyaning BMTdagi doimiy vakili birinchi o‘rinbosari Dmitriy Polyanskiy xabar berdi, deb ma'lum qilmoqda TASS.

«Azov dengizidagi vaziyatning xavfli rivoji va undan keyin ro‘y bergan hodisalar tufayli Rossiya 26 noyabr kuni Xavfsizlik kengashining ochiq yig‘ilishi zudlik bilan chaqirtirilishini talab qildi. Bunda yig‘ilish «Xalqaro tinchlik va xavfsizlikni ta'minlash» kun tartibi bandi bo‘yicha o‘tkaziladi», - dedi Polyanskiy.
 
Uning so‘zlariga ko‘ra, uchrashuv Moskva vaqti bilan soat 19:00ga rejalashtirilgan.

Eslatib o‘tamiz, avvalroq Poroshenko Ukrainada harbiy holat joriy etilganini izohlab, safarbarlik haqida gapirgandi.