Eron prezidenti: Fors ko‘rfazi xavfsizligini ta'minlash uchun xorij kuchlarining keragi yo‘q

Fors ko‘rfazi xavfsizligini mintaqa davlatlari xorij kuchlarini jalb qilmasdan ta'minlay oladi. Bu haqda Eron prezidenti Hasan Ruhoniy ma'lum qildi.

"Fors ko‘rfazi xavfsizligini ta'minlash uchun xorij kuchlarini jalb etishga hech qanday zarurat yo‘q", - deyiladi Eron prezidenti saytida joylashtirilgan bayonotda. 

Uning so‘zlariga ko‘ra, "Fors ko‘rfazi davlatlari muloqot va birdamlik shartlarida mintaqaviy barqarorlikni saqlashlari mumkin". 

"AQShning harakatlari ularga hech qanday foyda keltirmaydi", - deya ta'kidlanadi bayonotda.

Fors ko‘rfazi mintaqasidagi vaziyat Ummon ko‘rfazida ikkita tanker portlaganidan so‘ng keskinlashdi. AQSh bu voqea uchun javobgarlikni Eron zimmasiga yukladi, Buyuk Britaniya va Saudiya Arabistoni uni qo‘llab-quvvatladi. Tehron bu ayblovni rad etdi.