«PSJ» Messi bilan muzokaralar boshlagan, «Barselona» esa umidini uzgani yo‘q

«PSJ» «Barselona»ni erkin agent sifatida tark etgan hujumchi Lionel Messini o‘z safiga qo‘shib olishga harakat qilmoqda.

Jurnalist Janluka Di Marsioning yozishicha, tomonlar allaqachon muzokaralarni boshlashgan va «PSJ» argentinalik futbolchini o‘z loyihasiga ishontirishga umid qilmoqda.

Kataloniyadagi RAC radiosining xabar berishicha, «Barselona» rahbariyati 34 yoshli futbolchi bilan shartnomani uzaytirish umidini yo‘qotmagan. Klub vaziyatni o‘ta og‘ir deb hisoblaydi, ammo imkonsiz darajada emas. Endi direktorlar kengashi barcha narsani har tomonlama muhokama  qilmoqchi. Prezident Joan Laporta esa tez orada vaziyat bo‘yicha tushuntirish berishi kutilmoqda.

Messining o‘zi esa «Barselona» bilan shartnomani uzaytirish borasidagi muzokaralar buzilishini kutmagandi. U klub bilan shartnoma uzaytirilishiga umid qilgan. Ta'kidlanishicha, vaziyat futbolchining ruhiy holatiga ta'sir qilgan.

Eslatib o‘tamiz, 5 avgust kuni «Barselona» Messining jamoadan ketganini, tomonlar moliyaviy cheklovlar tufayli yangi shartnoma imzolay olishmaganini e'lon qildi.

Argentinalik futbolchining «ko‘k-anorranglilar» bilan shartnomasi iyun oyi oxirida tugagandi. U butun faoliyati davomida kataloniyaliklar tarkibida harakat qilgan. O‘tgan mavsumda La Ligada 35ta o‘yin o‘tkazib, 30ta gol va 9ta assistni o‘z hisobiga yozdirib qo‘ygan.