Toshkentda 10 metrlik chuqurlikka tushib ketgan fuqaro qutqarildi

Joriy yilning 5 yanvar kuni soat 13:58 da Toshkent shahar Yashnobod tumani Boyqo‘rg‘on mahallasi Sultonali Mashhadiy ko‘chasidagi uylarning birida fuqaro o‘z ehtiyotsizligi oqibatida hojatxona uchun qazilgan 10 metrlik chuqurlikka tushib ketgan.

FVV qutqaruvchilari zudlik bilan aytilgan manzilga yetib borib, qutqaruv anjomlari yordamida fuqaroni chuqurlikdan chiqarib olgan va birinchi yordam ko‘rsatgan. 

Shundan so‘ng fuqaroga malakali tibbiy yordam ko‘rsatish uchun tez tibbiy yordam xodimlariga topshirilgan. 

Fuqaro yengil tan jarohati olgan bo‘lib, hozirda shifokorlar nazorati ostida. Uning ahvoli yaxshi, deyiladi xabarda.