Qoʻshimcha funksionallar
-
Tungi ko‘rinish
Giyohvandlikka qarshi kurash: uch hududda yirik miqdordagi moddalar musodara qilindi
Davlat xavfsizlik xizmati (DXX) boshqa huquq-tartibot idoralari bilan hamkorlikda giyohvandlik vositalarining noqonuniy aylanmasiga qarshi tezkor tadbirlar o‘tkazdi. Samarqand, Surxondaryo va Xorazm viloyatlaridagi tadbirlar chog‘ida bir necha shaxs qo‘lga olindi, 10 kilogrammdan ortiq oshkora moddalar ashyoviy dalil sifatida olindi.
Samarqand viloyati — kontrabanda “opiy” (8 kg 860 gr)
Urgut tumanida yashovchi, 1998 yilda tug‘ilgan shaxs aylanma yo‘llar orqali Tojikistondan 8 kg 860 gr “opiy”ni noqonuniy ravishda olib kirishga uringan. DXX Chegara qo‘shinlarining to‘xtash to‘g‘risidagi qonuniy talabiga bo‘ysunmasdan qochgan shaxs tezkor choralar natijasida qo‘lga olindi. Tergovga qadar tekshiruvda uning jinoiy sherigi — Urgut tumanida yashovchi shaxs ham protsessual tartibda ushlandi.
Surxondaryo viloyati — Denovda “opiy” (jami 1 kg 514 gr)
Denov tumanida muqaddam giyohvandlik jinoyati uchun sudlangan shaxs tekshiruv paytida yonida 31 gr “opiy” bilan ushlandi. U moddani tuman fuqarosidan xarid qilganini aytdi. Keyingi tintuvda ushbu shaxsning yashash uyidan 1 kg 483 gr “opiy” topilib, ashyoviy dalil sifatida rasmiylashtirildi.
Xorazm viloyati — Gurlanda “gashish” (877 gr) sotuv paytida
Gurlan tumanida muqaddam ikki marotaba sudlangan shaxs 877 gr “gashish”ni 14 ming AQSh dollariga sotish vaqtida qo‘lga olindi. Tergov materiallariga ko‘ra, modda yurtga Tojikistonlik narkokurerlar orqali aylanma yo‘llardan olib kirilgan.
Barcha holatlar bo‘yicha Jinoyat kodeksining tegishli moddalari bilan jinoyat ishlari qo‘zg‘atildi, gumon qilinuvchilarga nisbatan “qamoq” ehtiyot chorasi qo‘llandi.
