“Navoiy” bojxona postida 2,3 kg “mefedron” kontrabandasi to‘xtatildi

Tezkor tadbir Toshkent viloyatida joylashgan “Navoiy” chegara bojxona postida amalga oshirildi. Qozog‘istondan kirib kelgan, Buxoro shahrida yashovchi 2000 yilda tug‘ilgan fuqaro boshqaruvidagi “Lada Largus” avtomashinasi belgilangan tartibda ko‘rikdan o‘tkazilgan.

Tekshiruv davomida transport vositasi yukxonasida bo‘lgan “Gazel” avtomashinasi uchun mo‘ljallangan uzatmalar qutisi ichiga xufiyona yashirilgan 5 dona o‘ram aniqlandi. O‘ramlar umumiy og‘irligi 2 kg 300 gramm bo‘lgan “mefedron” sintetik narkotik moddasidan iborat ekani ma’lum qilindi.

Ma’lum bo‘lishicha, “O‘zbekiston – Rossiya” yo‘nalishida kirakashlik bilan shug‘ullanuvchi mazkur fuqaro avtoehtiyot qismni Toshkent viloyatida kutib turgan, 2000 yilda Qashqadaryo viloyatida tug‘ilgan shaxsga yetkazib berishi kerak bo‘lgan. Tezkor tadbir davom ettirilib, buyurtmani qabul qilib olgan paytda qabul qiluvchi shaxs ham qo‘lga olindi.

Hozirda ushbu shaxslarga nisbatan Jinoyat kodeksining 246-moddasi 2-qismi (kontrabanda) va 273-moddasi 5-qismi (giyohvandlik vositalari, ularning analoglari yoki psixotrop moddalarni o‘tkazish) bilan jinoyat ishi qo‘zg‘atilib, “qamoq” ehtiyot chorasi qo‘llangan.

Tergov harakatlari olib borilmoqda.