Joriy yilning 16 iyun kuni Shavkat Mirziyoyev raisligida oliy ta'lim tizimidagi ustuvor vazifalarga bag‘ishlab videoselektor o‘tkazilgandi. Unda belgilab berilgan ustuvor yo‘nalishlar hamda Termiz davlat universitetini 2021-2023 yillarda innovatsion rivojlantirish va ta'lim sifatini ta'minlash dasturi qabul qilinib, shu asosda yangi o‘quv yiliga tayyorgarlik ko‘rildi.
Bugungi kunda universitetning 58 ta bakalavriat va 31 ta magistratura ta'lim yo‘nalishlarida 23271 nafar (ushbu talabalardan 208 nafarining imkoniyati cheklangan, 25 nafari esa chin yetimlar) talaba tahsil olmoqda. Magistrlar 2020-2021 o‘quv yilida 2017 yilga nisbatan qariyb 8 barobarga oshgan. Universitetda 1200 dan ortiq professor-o‘qituvchilar shtati mavjud, amalda 730 nafar professor-o‘qituvchilar faoliyat ko‘rsatmoqda. 450 shtat birligida professor-o‘qituvchilarga ehtiyoj bor. Ushbu ehtiyojni qoplash maqsadida bu yil 196 nafar magistratura bitiruvchilari, 110 nafar boshqa OTMlarda faoliyat yuritayotgan surxondaryolik mutaxassislar, bundan tashqari, o‘rindoshlik asosida 150 ga yaqin respublikaning yetakchi OTMlari professor-o‘qituvchilari universitetga jalb etilmoqda.
Aytish mumkinki, o‘tgan o‘quv yili universitet jamoasi uchun muvaffaqiyatli bo‘ldi. Xususan, jismoniy madaniyat fakulteti talabasi Umarbek Shohnazarov “Yil talabasi-2020” tanlovining respublika bosqichida “Yilning eng yaxshi sportchi”si deb topilgani bizga faxr berdi. Ma'lumot o‘rnida aytish mumkin, bugungi kunda universitetda 2 nafar jahon chempioni, 4 nafar Osiyo chempioni va 36 nafar nufuzli xalqaro musobaqalar, O‘zbekiston chempionati g‘olib va sovrindorlari tahsil olmoqda.
Joriy yilning mart oyida oliy ta'lim muassasalari talabalari o‘rtasida kurash sport turi bo‘yicha o‘tkazilgan “Vazir kubogi” musobaqasida asosiy tarkibi Termiz davlat universiteti talaba-yoshlari bo‘lgan Surxondaryo jamoasi birinchi o‘rinni egallab, “Vazir kubogi”ni qo‘lga kiritishdi. Bundan tashqari, Oliy ta'lim muassasalari talabalari o‘rtasida bo‘lib o‘tgan “Universiada-2020” sport musobaqalarining kurash bo‘yicha final bosqichi Termizda o‘tkazildi. Ushbu musobaqada universitetimiz talabalari jamoa hisobida uchinchi, Universiada yakuni bo‘yicha umumjamoa hisobida beshinchi o‘rinni egalladi. Natijada, yoshlarimizning sport sohasidagi yutuqlariga katta hissa qo‘shgan jismoniy madaniyat fakulteti o‘qituvchisi Abdurazzoq Ustoyev “O‘zbekiston sport faxriysi” ko‘krak nishoni bilan taqdirlandi.
Sportdagi yutuqlar boshqa yo‘nalishlarda ham davom etdi. “Uchinchi renessans – yoshlar nigohida” tanlovida doktorantlarimiz Aziza Xolboyeva va Xurshid Eshmurodov muallifligidagi loyiha hududiy bosqichda g‘olib topildi. 2020 yil dekabr oyida oliy ta'lim muassasalari talabalari o‘rtasida “Konstitutsiya – farovon hayotimiz poydevori” mavzusida o‘tkazilgan “Eng yaxshi insho” respublika tanlovida birinchi o‘rin tarix fakulteti talabasi Aziza Ro‘zimahmatovaga nasib qildi.
