Namangandagi “IT-Park”  yil oxiriga qadar 4000 nafardan ziyod yoshlarni dasturlash mutaxassisi qilmoqchi

Bundan 4 oy avval Namangan tajribasi sifatida viloyatda 13 ta “IT-Park” boshqaruvidagi “IT-School” o‘quv markazlari tashkil etilgan edi. Qisqa muddatda ushbu markazda 400 dan ortiq shu sohaga qiziqqan yoshlar o‘z bilim va malakalarini oshirishdi.

Ayni damda viloyatdagi “IT-School” o‘quv markazlarida 40 nafardan ziyod o‘qituvchi trener faoliyat olib bormoqda. O‘qitish Hindiston davlati bilan hamkorlikda ishlab chiqilgan “IT-Park” metodikasi asosida tashkil etilmoqda. 

Viloyatdagi ishsiz, “yoshlar daftari” va “temir daftar”da turuvchi yoshlar vakillari uchun 2021 yil 23 mart kunidan boshlab 9 oylik “Futere skills” loyihasi boshlandi. Mazkur loyiha asosida 70 nafar ishsiz yosh ishtirok etib, maxsus kurslarda o‘qimoqdalar. Loyiha davomida yoshlar loyihalarni ishlab chiqish, daromad topish bilan shug‘ullanishlari ko‘zda tutilgan. Bitiruvchilarning eng yaxshi 30 foizi “IT-park” direksiyasi tomonidan ushbu sohadagi kompaniyalarda ish boshlashlariga ko‘maklashish ko‘zda tutilgan.

Bu yerda oyda bir marotaba Amerika Qo‘shma Shtatlaridan tashrif buyurgan Software engineer Emili Rodrigez ishtirokida o‘quv markazi tinglovchilari uchun master-klass tashkil etilyapti.

Bugungi kunga qadar 17 815 nafar viloyat vakili “Bir million dasturchi” onlayn platformasidan ro‘yxatdan o‘tkazilib, o‘quvlarga jalb etildi.

Hozirgi kunda ushbu markazlarda 1200 nafardan ziyod tinlovchi axborot texnologiyalari yo‘nalishida tahsil olyapti. O‘tgan 4 oy davomida 460 nafar yosh kompyuter savodxonligi kurslari bo‘yicha sertifikatlarga ega bo‘ldilar. Yil oxiriga qadar 4000 nafardan ziyod yoshni dasturlash yo‘nalishlari bo‘yicha mutaxassis sifatida tayyorlash, eng yaxshi bitiruvchilarni frilatserlik faoliyatiga yo‘naltirish, rezidentlar sonini oshirish kabi ko‘plab ustuvor maqsadlar o‘z oldiga qo‘ygan, — deydi “IT-Park” viloyat direktori Muhammadali Ubaydullayev.