1 dekabrdan ko‘chma savdo faoliyati yangicha tartibda amalga oshiriladi - Prezident qarori

Adliya vazirligi xabariga ko‘ra, 2021 yil 1 dekabrdan:

• ko‘chma savdo faoliyati tadbirkorlar tomonidan ko‘chma savdo obektlarini elektron tarzda “K – SAVDO” avtomatlashtirilgan axborot tizimida ro‘yxatdan o‘tkazish yo‘li bilan amalga oshiriladi;
• Ro‘yxatdan o‘tkazish uchun yig‘im undirilmaydi;
• ko‘chma savdo joyi (xususiy mulkdorlarga tegishli joylardan tashqari) ko‘chma savdo obektlari joylashish sxemalari bo‘yicha “K – SAVDO” orqali elektron auksionda sotiladi.

Auksion boshlang‘ich narxi tegishli tuman (shahar)dagi yer uchastkasining yer solig‘i miqdorida belgilanadi. Auksion g‘olibi tomonidan ko‘chma savdo joyi qiymati to‘liq to‘langanidan so‘ng unga “K – SAVDO” tizimi orqali avtomatik ravishda QR-kod qo‘yilgan guvohnoma beriladi hamda u mazkur joydan 36 oy muddatga foydalanish huquqiga ega bo‘ladi. Bunda ko‘chma savdo joyidan foydalanish bo‘yicha shartnoma tuzish talab etilmaydi.

Shuningdek, hujjatga ko‘ra:

• savdo avtomatlariga nisbatan nazorat-kassa texnikalaridan majburiy foydalanish talabi tatbiq etilmaydi;
• sotadigan tovarlari va (yoki) ko‘rsatadigan xizmatlari turidan qat'i nazar bunday faoliyat bilan shug‘ullanuvchi yuridik shaxslar chakana savdo sohasidagi soliq to‘lovchi deb e'tirof etiladi.