Rossiyalik ovchi Surxondaryoda Qizil kitobga kiritilgan jonivorni ovladi

Dunyoning turli manzillarida ov qilib, jarayonni tasvirga olgan Sergey Mazurkevichning bu safargi manzili O‘zbekiston bo‘lgan. U 3 kun oldin ijtimoiy tarmoqdagi “Trofeynaya oxota” kanalida O‘zbekistondagi ov jarayonidan tayyorlangan filmni e’lon qildi.

Filmdan ko‘rish mumkinki, ovchi va tasvirga olish guruhi Surxondaryo viloyati hududida, tog‘li manzilda bo‘lishgan. Ovchi Accuracy International AXMC-338 nomli quroli bilan bir bosh morxo‘r (tog‘ echkisi) hamda bir bosh arxarni ovlagan.

Kun.uz muxbiri holatga aniqlik kiritish uchun Tabiat resurslari vazirligi mas’uli bilan bog‘landi. Unga ko‘ra, rossiyalik ovchi morxo‘r va arxarni qonuniy tarzda ovlagan. 

“Rossiyalik ovchi o‘lja ovini belgilangan ruxsat asosida, ov quroli bilan amalga oshirgan. Buning uchun Fanlar akademiyasining xulosasi olingan. Aslida, buning foydali tomonlari ham bor. Yovvoyi hayvonni otib o‘ldirdi, degan oddiy xulosaga bormaslik kerak. Yaqinda ovchilik turizmi bo‘yicha xalqaro mutaxassislarni jalb qilgan holda tadbir o‘tkazishni reja qilib turibmiz. Asosiy maqsad yovvoyi va kamyob hayvonlarning ko‘payishiga imkon yaratish”, — deydi Kun.uz muxbiri bilan gaplashgan vazirlik mas’uli.    

Ikki yil oldin Rossiya fuqarosi Ye.P.Shirokov Bo‘stonliq tumanida 1 dona qo‘ng‘ir ayiqni otib, u bilan vahshiylarcha suratga tushgandi. O‘shanda unga 2 dona Tyanshan qo‘ng‘ir ayig‘ini otishga ruxsatnoma berilgandi. Jamoatchilikning keskin e’tirozidan so‘ng ovchidan ikkinchi qo‘ng‘ir ayiqni ovlashga berilgan ruxsatnoma qaytarib olingan edi.

Ma’lumot uchun, morxo‘rlar Surxondaryo viloyatining sharqiy qismidagi tog‘ tizmalari (Bobotog‘)da uchraydi. Soni keskin kamayib ketganligi sabab O‘zbekiston Qizil kitobiga kiritilgan edi.