Tennis: Rahimova va Timofeyevadan keyin Kudermetova ham O‘zbekistonga o‘tdi

Rossiyalik tennischi Polina Kudermetova sport fuqaroligini o‘zgartirib, endi O‘zbekiston sharafini himoya qiladi. Bundan oldin uning bir necha hamkasblari O‘zbekiston bayrog‘i ostiga o‘tgan edi.

Polina Kudermetova / Foto: Clive Brunskill/Getty Images

Xalqaro tennis federatsiyasi (ITF) saytidagi sportchining profaylida endi u O‘zbekiston vakili sifatida qayd etilgan. Biroq Kudermetovaning o‘zi fuqarolikni o‘zgartirgani haqida omma oldida bayonot bermagan.

Hozirda 22 yoshli tennischi WTA reytingida 104-o‘rinni egallab turibdi. Kudermetova yirik xalqaro turnirlarda Rossiya nomi bilan ishtirok etmagan, ammo endilikda u O‘zbekiston nomidan Olimpiada hamda jamoaviy jahon chempionati — Billie Jean King Cup musobaqasida qatnashish imkoniyatiga ega bo‘ldi.

Avvalroq rossiyalik tennischi Kamilla Rahimova ham O‘zbekiston bayrog‘i ostiga o‘tgan edi.

Shuningdek, rossiyalik tennischi Mariya Timofeyeva ham sport fuqaroligini o‘zgartirgan.

Bundan tashqari, Rossiyadan bo‘lgan 15 yoshli Aleksandra Barmicheva ham O‘zbekiston sharafini himoya qilmoqda. W15 Tashkent 2025 turnirida u eng yosh ishtirokchi bo‘lgan.

Tayyorlagan: Отабек Матназаров

#tennis #Polina Kudermetova