Myanmada binoda yuz bergan portlash oqibatida 46 kishi halok bo‘ldi

Portlash 31 may kuni Namxkam okrugidagi Kaungtup qishlog‘ida sodir bo‘lgan. Qutqaruvchilarning fikricha, binoda konchilik ishlarida foydalaniladigan portlovchi moddalar saqlangan bo‘lishi mumkin.

Portlash oqibatida 46 kishi, jumladan, 6 nafar bola halok bo‘lgan, 74 kishi shifoxonaga yotqizilgan, deb xabar berdi Associated Press va The Washington Post qutqaruvchilarga asoslanib.

Yana bir qutqaruvchining ma’lumot berishicha, yaqin atrofdagi 100 dan ziyod uylarga ham zarar yetgan.

Hodisa sodir bo‘lgan hudud Xitoy chegarasidan 3 km janubda joylashgan bo‘lib, u Taang milliy ozodlik armiyasi (TNLA) nazorati ostida.  

TNLA bayonotiga ko‘ra, portlashga konchilik ishlari uchun mo‘ljallangan gelignit moddasi sabab bo‘lgan.