ShHT sammitining asosiy hujjati – Samarqand deklaratsiyasida nimalar aks etadi?

Deklaratsiyada ShHT faoliyati bo‘yicha baho, tashkilotni rivojlantirish istiqbollari bo‘yicha a’zo davlatlar o‘rtasida kelishilgan yondashuv, shuningdek, hozirgi xalqaro va mintaqaviy vaziyat borasidagi tashkilotning pozitsiyasi aks ettirilgan. Bu haqda O‘zbekistonning ShHT bo‘yicha milliy koordinatori Rahmatilla Nurimbetov Kun.uz'ga ma’lum qildi.

Bundan tashqari, hujjatda ShHT rivojlanishining hozirgi bosqichida o‘z oldidagi vazifalarini qanday ko‘rishi kerakligi haqida ham muhim ma’lumotlar mavjud.

«Deklaratsiyada O‘zbekistonning ShHTga samarali raisligi yakunlari hamda raislik doirasida mamlakatimiz ilgari surayotgan tashabbus va hujjatlarning ahamiyati o‘z ifodasini topadi. Shuningdek, tashkilot faoliyatini kengaytirish va takomillashtirish masalalari ham ko‘rib chiqiladi», - deydi milliy koordinator.

Nurimbetovning ma’lum qilishicha, deklaratsiyada prezident Shavkat Mirziyoyev o‘z maqolasida ilgari surgan g‘oyalar ham o‘z ifodasini topishi kutilmoqda.

«ShHTni kengaytirish masalasiga kelsak, ayni vaqtda ShHTga a’zo davlatlar Milliy koordinatorlari kengashining davom etayotgan yig‘ilishida Belarusning to‘laqonli a’zolik to‘g‘risidagi arizalari, shuningdek, ShHT muloqoti bo‘yicha hamkor maqomiga ega bo‘lish uchun bir qator davlatlar, xususan arab davlatlarining arizalari ko‘rib chiqilmoqda. Maslahatlashuvlar jarayoni ShHTni yanada kengaytirish bo‘yicha ijobiy qarorlarga umid qilish imkonini beradi. Biz optimistik kayfiyatdamiz. Umid qilamizki, Samarqand sammiti bu borada juda muvaffaqiyatli o‘tadi», - deya Rahmatilla Nurimbetovning so‘zlarini keltirmoqda Kun.uz muxbiri.