Samarqand viloyatini rivojlantirish bo‘yicha Prezident qarori qabul qilindi

2025 yil 27 dekabr kuni “Samarqand viloyatini ijtimoiy-iqtisodiy rivojlantirishga qaratilgan chora-tadbirlarni yanada jadallashtirish to‘g‘risida”gi prezident qarori (PQ–392-son) qabul qilindi.

Qarorga ko‘ra, Samarqand viloyatida drayver loyihalarni amalga oshirish uchun zarur shart-sharoitlarni yaratishni nazarda tutuvchi manzilli dastur tasdiqlandi. Unda, xususan, transport infratuzilmasini yaxshilash maqsadida xalqaro, davlat va mahalliy ahamiyatga ega hamda ichki xo‘jaliklararo 298 km avtomobil yo‘llari, shuningdek 15 ta yo‘l o‘tkazgichni qurish, rekonstruksiya qilish va ta’mirlash ishlari belgilangan.

Elektr ta’minoti tizimini takomillashtirish doirasida 14 ta tuman (shahar)da 1 ta podstansiyani ta’mirlash, 70 ta transformator punktini o‘rnatish, 137 km elektr tarmoqlarini yangilash rejalashtirilgan.

Ichimlik suvi va oqova suv tizimini yaxshilash maqsadida esa 14 ta tumanda 90 ta suv inshooti, 242 km suv tarmog‘ini qurish va ta’mirlash nazarda tutilgan.

Qarorga asosan, 2026 yil 1 iyuldan Samarqand viloyatida qator yangi mexanizmlar joriy etiladi. Jumladan, qishloq xo‘jaligi korxonalari tomonidan to‘lanadigan suv resurslaridan foydalanganlik uchun soliq tushumlari to‘liq tuman (shahar) suv korxonalari ixtiyoriga o‘tkaziladi. Shuningdek, suv tejovchi texnologiyalarni kengaytirish maqsadida talabgorlarga paxta maydonlarida joriy etilgan tomchilatib sug‘orish tizimlari uchun belgilangan tartibda har bir gektariga 12 mln so‘mdan subsidiya ajratiladi.

Shu bilan birga, 2026 yil 1 yanvardan viloyatdagi qurilish, ta’mirlash va modernizatsiya qilish loyihalari qat’iy ravishda “yashil” tamoyillar hamda energiya samaradorligi bo‘yicha minimal talablar asosida amalga oshirilishi belgilandi.

Ta’lim sohasida ham yangi tashabbuslar ko‘zda tutilgan. Xususan, 2026-2027 o‘quv yilidan Kattaqo‘rg‘on davlat pedagogika institutida Toshkent shahridagi Turin politexnika universiteti bilan hamkorlikda muhandislik yo‘nalishlari bo‘yicha fakultet tashkil etish choralari ko‘riladi.