Ming dollar evaziga “ekspertiza” va’dasi: inspektor qo‘lga olindi

Xorazm viloyatida profilaktika inspektori jabrlanuvchiga tanishlari orqali ish tergoviga ta’sir ko‘rsatishni ming dollar evaziga taklif qilgan. IIV matbuot xizmati xabariga ko‘ra, figurant Xiva shahrida maxsus operatsiya paytida qo‘lga olingan.

Ma’lum bo‘lishicha, fuqaro profilaktika inspektoriga biznesdagi sherigi bilan mojarosi haqida shikoyat qilgan. Unga ko‘ra, sherigi qo‘shma kompaniya hujjatlaridagi imzolarni soxtalashtirib, daromadlarni o‘zlashtirib kelgan. Ko‘rsatilgan summa evaziga inspektor arizachi foydasiga ekspertiza tashkil etishni va’da qilgan.

Xorazm viloyati prokuraturasi xizmat mavqeidan foydalangan holda sodir etilgan firibgarlik va pora berish moddalari bo‘yicha jinoyat ishini qo‘zg‘atdi. Inspektor qamoqqa olingan.

IIV korrupsiya yoki boshqa huquqni muhofaza qiluvchi organlar xodimlari tomonidan sodir etilgan jinoyatlarga guvoh bo‘lgan fuqarolardan 1102 yoki (71) 234-31-74 raqamlariga murojaat qilishni so‘radi.