O‘zbekistonda davlat xizmatini rivojlantirish bo‘yicha tuzilma paydo bo‘ladi

O‘zbekistonda birinchi marta davlat xizmatiga javobgar alohida idora tashkil etiladi. Davlat xizmatchilarining huquqiy maqomi, davlat xizmatiga kirish, o‘tash va tugatish tartibini belgilovchi qonun loyihasi normativ-huquqiy hujjatlar muhokamasi portalida e'lon qilindi.
 
Hujjatga ko‘ra, davlat xizmati ishlari bo‘yicha vakolatli organ etib O‘zbekiston prezidenti huzuridagi Davlat xizmati milliy agentligi belgilanadi.

Yangi tuzilma davlat xizmati institutining shakllanishi, mansabdor shaxslarga qo‘yiladigan talablar, ularni o‘qitish, bo‘sh lavozimlarga nomzodlarni tanlash uchun javobgardir.

Agentlik shuningdek, davlat xizmati tizimini va davlat kadrlar siyosatini takomillashtirish masalalari bo‘yicha prezidentga takliflarni taqdim etishi mumkin.

Parlament va jamoatchilik nazoratini kuchaytirish maqsadida Oliy Majlis huzurida Davlat xizmati kengashi tashkil etiladi. U har yili agentlikning davlat xizmatining rivojlanish holati va istiqbollari haqidagi hisobotlarini qabul qiladi.

Eslatib o‘tamiz, avvalroq davlat xizmatchilari daromadlari va xarajatlari to‘g‘risida hisobot berishga majbur bo‘lishi xabar qilingandi.