Davlat xizmatini rivojlantirish agentligi o‘rnida Boshqaruv samaradorligi agentligi tuzildi

Farmonga ko‘ra, yangi agentlik davlat boshqaruvi tizimida samaradorlik, natijadorlik va mas’uliyatni kuchaytirish, shuningdek, davlat xizmatini zamonaviy yondashuvlar asosida takomillashtirish vazifalarini bajaradi.

Hujjatga muvofiq, 2026 yil 1 yanvardan boshlab “Yangi O‘zbekiston qiyofasidagi tuman (shahar)” maqomiga ega 33 ta tuman va shahar hokimliklarida tajriba-sinov tariqasida natijaga asoslangan boshqaruv tizimi joriy etiladi. Bunda:

davlat organlari faoliyatining maqsadli ko‘rsatkichlari va indikatorlari ularga yuklatilgan vazifalar asosida Boshqaruv samaradorligi agentligi tomonidan shakllantiriladi;
ushbu ko‘rsatkichlar Vazirlar Mahkamasi tomonidan tasdiqlanadi.

Farmonda Agentlikka quyidagi vazifalar yuklatilgan:

• natijaga asoslangan boshqaruv modelini ishlab chiqish va uning joriy etilishini uslubiy jihatdan muvofiqlashtirish;
• davlat organlari faoliyati samaradorligini va maqsadli ko‘rsatkichlarga erishish darajasini samaradorlik.gov.uz elektron platformasi orqali baholashni tashkil etish;
• tegishli vazifalarni bajarish va ko‘rsatkichlarga erishish jarayonida kadrlar salohiyatini rivojlantirishga ko‘maklashish;
• davlat fuqarolik xizmati lavozimlarini egallash uchun tanlovlarda zamonaviy yondashuvlarni joriy etish, zarur hollarda qo‘shimcha bosqichlar belgilash.

Mazkur farmon davlat xizmati tizimini yangi bosqichga olib chiqish, mansabdor shaxslar faoliyatini aniq natijalar asosida baholash va aholiga ko‘rsatiladigan davlat xizmatlari sifati hamda samaradorligini yanada oshirishga qaratilgan.