O‘zbekistonda Haj va Umra qiluvchilarni tayyorlovchi seminar-treninglar tashkil etiladi

O‘zbekistonda Indoneziya va Malayziya davlatlari tajribasidan kelib chiqqan holda, Haj va Umra qiluvchilarni tayyorlash bo‘yicha maxsus o‘quv darslari tashkil etiladi. Ularda Islomning beshinchi ustuni bo‘lgan Haj ibodatini va Umra ziyoratini qanday qilib sifatli ado etishga doir ma'lumotlar beriladi. Bu haqda Vazirlar Mahkamasi huzuridagi Din ishlari bo‘yicha qo‘mita rahbaari o‘rinbosari Nuriymon Abulhasan Kun.Uz muxbiriga bergan blits-intervyusida ma'lum qildi. 

Ma'lumki, ayrim holatlarda Haj va Umra amallarini bajarib kelgan yurtdoshlarimiz, ba'zi hollarda noo‘rin amallar qilishadi. Muqaddas zaminlarga borib kelgan kishilarda bo‘lishi darkor bo‘lgan odob-ahloq me'yorlarini unutib qo‘yishadi. Muxbirning Nuriymon Abulhasanga bergan ilk savoli ham shu mazmunda bo‘ldi.

-  Bugungi xushxabar uchun davlat rahbariyati va sizga ham rahmat aytamiz. Nuriymon aka, brifing chog‘ida Haj, Umra mohiyati haqida so‘z yuritdingiz. Haj va Umra ibodatlarining mazmun-mohiyatini oshirish uchun qanday ishlar amalga oshirilishi kerak?

Video: TasIX

Video: YouTube

-  Avvalambor, 2018 yilgi Haj mavsumi davrida mana shu Haj va Umra masalalarini jiddiy o‘rganib chiqish, avvalgi yillardagi ba'zi bir xato va kamchiliklarning o‘rnini to‘ldirish, ularga barham berish maqsadida xalqaro tajribani o‘rgandik. Bir yilda 150-200 ming hojilarga xizmat ko‘rsatish bo‘yicha tashkiliy ishlar bilan shug‘ullanuvchi musulmon davlatlar vakillari bilan gaplashib, shu narsani bilib oldikki, Haj mavsumi davrida hajga keluvchilar uchun ko‘plab sharoitlar yaratilar ekan. O‘qishlar tashkil etilib, malakasi oshirilar, seminar-treninglar bo‘lar ekan. 

Hajga boruvchilarga Haj tarixi, Saudiya Arabistonidagi muqaddas joylar tarixi, Islom tarixida ularning mavqei, o‘rniga doir bir nechta bosqichma-bosqich darslar tashkil etilgan ekan. O‘rganishlarimiz, olgan ma'lumotlarimiz natijasida, o‘zimizga, mentalitetimizdan kelib chiqqan holda shu kabi o‘quvlarni 5 oy avval boshlashni rejalashtirdik. Bu darslarda ham Haj, ham Umra masalalariga alohida e'tibor beriladi. Mazkur ibodatlarni amalga oshiruvchilar uchun qo‘llanmalar ishlab chiqilyapti. Kelgusida bu ibodatni chiroyli, shariat ko‘rsatmalari asosida amalga oshirishlari uchun barcha sharoitlarni muhayyo qilishlari uchun ishlar olib borilmoqda. 

Yana bir ish ustida o‘rganishlar olib borilmoqdaki, masalan, Indoneziya va Malayziya kabi Islom diniga e'tiqod qiluvchilar ko‘pchilikni tashkil etuvchi mamlakatlarda Haj mavsumini yuqori saviyada o‘tkazishlari uchun kerakli joylarning maketlari ham barpo etilgan. Bu nima beradi? Odamlarimizning muqaddas shaharlarga borishga tayyorgarlik ko‘rishi, aylanish, boshqa sa'y-harakatlar, Safo-Marvalar o‘rtasida sa'yi qilishlarni o‘rganishadi. Bundan tashqari, o‘zlarining jismoniy imkoniyatlarini ham sinab olishadi. U yerlarga borish uchun ham ma'nan, ham jismonan, ham ruhan tayyor bo‘lishadi.

Youtube'da ko‘rish

Mover.uz'da ko‘rish